शिवसेनेचे तळ्य़ात-मळ्य़ात

नगरसेवक वा-यावर; पदाधिका-यांचा ताळमेळ नाही!

अकोला: महापालिकेसह राज्यात सत्तास्थानी असलेल्या शिवसेनेला कणखर भूमिकेचा विसर पडला की काय, अशी स्थिती शहरात निर्माण झाली आहे. एकीकडे सभागृहात सिमेंट रस्त्यांना विरोध दर्शविणार्‍या शिवसेनेने आता १२ दुकानांच्या प्रकरणात भाजपच्या विरोधात बाह्या वर खोचल्याची माहिती आहे. तर दुसरीकडे प्रशासनाच्या मनमानीला विरोध करणार्‍या सेना नगरसेवकांवर प्रशासनाकडून गुन्हे दाखल झाल्यानंतरही पदाधिकार्‍यांनी बघ्याची भूमिका घेतली. पक्षाच्या विसंगत भूमिकेमुळे शिवसैनिकांमध्ये प्रचंड अस्वस्थता निर्माण झाली असून, ही खदखद कोणत्याही क्षणी उफाळून बाहेर येण्याचे संकेत आहेत. केंद्रासह राज्यात सत्ता असतानादेखील महापालिकेत सेना-भाजपची मने दुभंगल्याचे चित्र सतत समोर येत आहे. सत्तापक्षातील दुफळीचा फायदा विरोधकांपेक्षा अधिकारीच जास्त घेत आहेत. सिमेंट काँक्रीट रस्त्यांच्या निविदा प्रक्रियेत प्रशासनाने संबंधित कंत्राटदाराला साडेबारा टक्के आगाऊ रक्कम मंजूर केलीच कशी, असा प्रश्न उपस्थित करीत १६ जुलैच्या सर्वसाधारण सभेत शिवसेनेच्या गटनेत्या मंजूषा शेळके यांनी विरोध दर्शविला. अर्थातच ही पक्षाची भूमिका असतानासुद्धा उपमहापौर विनोद मापारी यांनी चुप्पी साधणे पसंत केले. सेनेचा विरोध धुडकावून लावत भाजपने सिमेंट रस्त्यांच्या निविदेला मंजुरी दिली. आता खुले नाट्यगृहानजीकच्या १२ दुकानांना मंजुरी देण्यासाठी भाजपने अनुकूलता दर्शवली असून, हा विषय २ सप्टेंबर रोजी आयोजित विशेष सभेत मांडल्या जाणार आहे. या विषयाला विरोध करण्यावर शिवसेनेत काथ्याकुट सुरू आहे. एकूणच, शहराच्या निर्णय प्रक्रियेत ठोस निर्णय घेण्याऐवजी सेनेचे तळ्य़ात-मळ्य़ात सुरू असतानाच स्वपक्षीय नगरसेवकांच्या बाबतीतही पक्षाची भूमिका कचखाऊ असल्याचे नुकतेच दिसून आले. नागरिकांच्या सुविधेसाठी प्रभागात नालीचे बांधकाम करणारे नगरसेवक पंकज गावंडे नियमबाह्य बांधकाम करीत असल्याचा आरोप करीत त्यांच्या विरोधात प्रभारी उपायुक्त माधुरी मडावी यांनी पोलिसात तक्रार केली. या प्रकरणी गावंडे आणि पावसाळे यांच्या विरोधात गुन्हा दाखल झाला. या मुद्यावर प्रशासनाला जाब विचारणे शिवसेनेकडून अपेक्षित होते. तसे न करता, पदाधिकार्‍यांनी तोंडाला कुलूप लावणे पसंत केले. एकूणच, शिवसेनेत पदाधिकारी व नगरसेवकांमध्ये कवडीचाही ताळमेळ राहिला नसल्याने शिवसैनिकांमध्ये नाराजी पसरली आहे, हे तेवढेच खरे.