जात पडताळणीचे प्रस्ताव सोमवारपर्यंत स्वीकारणार

ग्रामपंचायत निवडणुका; सुटीच्या दिवशीही कक्ष राहणार सुरू.

अकोला: ग्रामपंचायत निवडणुकांमध्ये मागासवर्गीयांसाठी आरक्षित प्रभागातून निवडणूक लढविणार्‍या इच्छुक उमेदवारांच्या जात वैधता प्रमाणपत्र पडताळणीचे प्रस्ताव सोमवार, २0 जुलैपर्यंत विभागीय जाती प्रमाणपत्र पडताळणी समितीकडून स्वीकारण्यात येणार आहेत. प्रस्ताव स्वीकारण्यासाठी शनिवार व रविवार या सुटीच्या दोन दिवशीही विभागीय जाती पडताळणी समिती कार्यालयातील कक्ष सुरू राहणार आहे. जिल्ह्यातील २२0 ग्रामपंचायतींच्या सार्वत्रिक निवडणुका आणि ४८ ग्रामपंचायतींच्या पोटनिवडणुकांसाठी ४ ऑगस्ट रोजी मतदान घेण्यात येणार आहे. ग्रामपंचायत निवडणुकांमध्ये आरक्षित जागेवर निवडणूक लढविणार्‍या इच्छुक उमेदवारांना उमेदवारी अर्ज सादर करताना, अर्जासोबत जात वैधता प्रमाणपत्रासाठी विभागीय जाती प्रमाणपत्र पडताळणी समितीकडे प्रस्ताव सादर केल्याची पोचपावती सादर करणे आवश्यक आहे. त्यानुषंगाने ग्रामपंचायत निवडणुकीत आरक्षित जागांवर निवडणूक लढविणार्‍या उमेदवारांकडून अकोल्यातील विभागीय जाती प्रमाणपत्र पडताळणी समिती कार्यालयात जात वैधता प्रमाणपत्रासाठी प्रस्ताव दाखल करण्यात येत आहेत. ग्रामपंचायत निवडणुकीसाठी इच्छुक उमेदवारांकडून जात वैधता प्रमाणपत्रासाठी विभागीय जाती प्रमाणपत्र पडताळणी समितीकडे प्रस्ताव सादर करण्यासाठी शुक्रवार, १७ जुलै ही शेवटची तारीख यापूर्वी निश्‍चित करण्यात आली होती. दरम्यान, ग्रामपंचायत निवडणुकांमध्ये मागासवर्गीयांसाठी आरक्षित प्रभागातून निवडणूक लढविणार्‍या उमेदवारांच्या जात पडताळणीचे प्रस्ताव २0 जुलैपर्यंत स्वीकारण्याचा आदेश राज्य निवडणूक आयोगामार्फत विभागीय जात प्रमाणपत्र पडताळणी समिती कार्यालयांना देण्यात आला. उमेदवारांचे जात पडताळणीचे प्रस्ताव स्वीकारण्यासाठी १८ ते २0 जुलैपर्यंत विभागीय जात प्रमाणपत्र समिती कार्यालयातील एक कक्ष सुरू ठेवण्याचेही आदेशात नमूद करण्यात आले आहे. त्यानुसार शनिवार, १८ जुलै व रविवार, १९ जुलै या सुटीच्या दोन दिवसातही उमेदवारांकडून जात पडताळणीचे प्रस्ताव स्वीकारण्यात येणार आहेत.