६0 साहाय्यक नगर रचनाकारांना पदोन्नती

६६ पैकी ६0 साहाय्यक नगर रचनाकारांची नगर रचनाकार म्हणून पदोन्नती; सहा जण ‘वेटिंग’वर.

अकोला: महापालिकेच्या नगररचना विभागात सक्षम अधिकार्‍यांअभावी नकाशा मंजुरीसाठी फाईलींचा ढीग साचत असल्याचे चित्र जवळपास सर्वत्रच आहे. यावर उपाय म्हणून नगर विकास राज्यमंत्री डॉ.रणजित पाटील यांनी ६६ पैकी ६0 साहाय्यक नगर रचनाकारांची नगर रचनाकार म्हणून पदोन्नती केली असून, उर्वरित सहा जण ह्यवेटिंगह्णवर असल्याची माहिती आहे. राज्यात अनधिकृत बांधकामांची वाढती संख्या व चटई क्षेत्र निर्देशांकमध्ये (एफएसआय) वाढ करण्याची बांधकाम व्यावसायिकांची मागणी लक्षात घेता शासनाने या मुद्यावर अभ्यास करून सूचनांचा अहवाल सादर करण्यासाठी मुंबई मनपाचे तत्कालीन आयुक्त सीताराम कुंटे यांच्या अध्यक्षतेखाली समिती गठित केली होती. शासकीय व आरक्षित जमिनी वगळता इतर ठिकाणी उभारलेली अनधिकृत बांधकामे नियमित करणे शक्य असल्याचा अहवाल कुंटे समितीने सादर केला. यादरम्यान, नकाशा मंजुरीच्या फाइल्सचा निपटारा करण्यासाठी संबंधित महापालिकेच्या नगररचना विभागात सक्षम अधिकार्‍यांची पदे रिक्त असल्याचे शासनाच्या लक्षात आले. त्यानुषंगाने नगर विकास राज्यमंत्री डॉ.रणजित पाटील यांनी पुणे येथील नगर विकास विभागाचे तत्कालीन संचालक आकोडे यांच्यासोबत रिक्त पदे व डीसी रूलच्या मुद्यावर अनेकदा चर्चा केली. संबंधित विभागाने राज्यातील ६६ साहाय्यक नगर रचनाकारांना नगर रचनाकार म्हणून पदोन्नती देण्याची फाइल परस्पर तयार केल्याचा प्रकार नगर विकास विभागाच्या लक्षात आला होता. या गंभीर प्रकाराची नगर विकास राज्यमंत्र्यांनी दखल घेतली; मात्र मनपामध्ये नगर रचनाकार पद रिक्त असल्याने नकाशा मंजुरीचे कामकाज खोळंबले असल्याने नगर विकास राज्यमंत्र्यांनी ६६ पैकी ६0 साहाय्यक नगर रचनाकार यांना नगर रचनाकार म्हणून गत आठवड्यात पदोन्नती दिली.