ट्रकच्या धडकेत मोपेडस्वार ठार

बेताल वाहतुकीचा अकोला शहरात पुन्हा एक बळी.

अकोला: रेतीने भरलेल्या भरधाव ट्रकने समोरील मोपेडस्वारास जबर धडक दिल्याने, मोपेडस्वाराचा जागीच मृत्यू झाला. ही घटना सोमवारी सकाळी ११.१५ वाजताच्या सुमारास नेहरू पार्क चौकात घडली. अपघातानंतर ट्रकचालक घटनास्थळाहून फरार झाला. या प्रकरणी सिव्हिल लाइन पोलिसांनी गुन्हा दाखल केला. जुने शहरातील गोडबोल प्लॉटमध्ये राहणारे चंद्रकांत अनंतराव जोशी (५२) हे सोमवारी सकाळी ११ वाजताच्या सुमारास त्यांच्या एमएच २८ जी ७0३८ क्रमांकाच्या लुनाने नेहरू पार्क चौकाकडून जात होते. दरम्यान, त्यांच्या मागाहून एमटीव्ही २२५0 क्रमांकाच्या रेतीने भरलेल्या भरधाव ट्रकने त्यांच्या मोपेडला जबर धडक दिली. एवढेच नाहीतर ट्रकची चाके त्यांचे डोके व चेहर्‍यावरून गेल्याने चंद्रकांत जोशी यांचा जागीच मृत्यू झाला. जोशी यांचा चेहरा छिन्नविछिन्न झाल्यामुळे ओळखूही येत नव्हता. जोशी यांना धडक दिल्यानंतर अनियंत्रित झालेल्या ट्रकचालकाने समोरून येणार्‍या ट्रकलाही धडक दिली. यात त्या ट्रकच्या समोरील भाग क्षतिग्रस्त झाला. सिव्हिल लाइन पोलिसांनी घटनास्थळावर पोहोचून मोपेड व ट्रक ताब्यात घेतला. मेहरेनगरातील विजय मधुसुदन डांगे यांच्या तक्रारीनुसार, पोलिसांनी ट्रकचालकाविरुद्ध भादंवि कलम २७९, ३0४ (अ) व १८४ नुसार गुन्हा दाखल केला. चंद्रकांत जोशी यांची पत्नी खंडेलवाल प्राथमिक शाळेत शिक्षिका म्हणून नोकरी करतात. त्यांना एक मुलगी असून, ती कोपरगाव येथे अभियांत्रिकीला शिकते. माजी नगरसेवक विलास शेळके यांच्याकडे जोशी सुपरवायझर म्हणून काम करायचे. मंगळवारी दुपारी त्यांचेवर अंत्यसंस्कार करण्यात येणार आहेत.