महागाईच्या मुद्यावर काँग्रेसचे पर्दाफाश आंदोलन

अखिल भारतीय काँग्रेस कमिटीच्यावतीने शुक्रवारी जिल्हाधिकारी कार्यालयासमोर पर्दाफाश आंदोलन करण्यात आले.

अकोला : 'अच्छे दिन'चे आश्‍वासने देत सत्तापक्षात बसलेल्या मोदी सरकारने जनतेची थट्टा केल्याचा आरोप करीत अखिल भारतीय काँग्रेस कमिटीच्यावतीने शुक्रवारी जिल्हाधिकारी कार्यालयासमोर पर्दाफाश आंदोलन करण्यात आले. आंदोलनादरम्यान जिल्हाधिकारी कार्यालय चौकात पुतळा दहन करण्याचा प्रकार प्रथमच करण्यात आला. अखिल भारतीय काँग्रेस कमिटीचे प्रदेशाध्यक्ष अशोक चव्हाण यांच्या नेतृत्वात शुक्रवारी राज्य स्तरावर मोदी सरकारविरोधी पर्दाफाश आंदोलन करण्यात आले. याच आंदोलनाचा एक भाग म्हणून अकोल्यातील जिल्हाधिकारी कार्यालयासमोर जिल्हा काँग्रेस कमिटीच्यावतीने आंदोलन करण्यात आले. आंदोलनादरम्यान जनतेला पारदर्शक सरकारचे आश्‍वासन देणार्‍या मोदी सरकाने जनतेची थट्टा केली असून, पंतप्रधान विदेश दौर्‍यांमध्ये व्यस्त असल्याची घोषणाबाजी करण्यात आली. वाढती महागाई, बेरोजगारी, शेतकर्‍यांच्या आत्महत्या आदी विषयांवर लक्ष केंद्रित करण्यात आले.या नंतर काँग्रेस कमिटीच्यावतीने जिल्हाधिकारी कार्यालय चौकात पंतप्रधान मोदी तसेच महागाईच्या प्रतीकात्मक पुतळ्य़ाचे दहन करीत घोषणाबाजी करण्यात आली. जिल्हाधिकारी कार्यालय परिसरात आंदोलनादरम्यान पुतळा दहनाची ही पहिलीच घटना असल्याने याकडे सर्वांचे लक्ष आकर्षित झाले. उपस्थित काँग्रेसच्या पदाधिकारी व कार्यकर्त्यांनी शेतकर्‍यांच्या समस्या, जनावरांच्या चारा-पाण्याच्या तसेच वाढत्या महागाईच्या मुद्यावर सरकारविरोधी घोषणाबाजी करण्यात आली. आंदोलनात काँग्रेसचे माजी प्रदेशाध्यक्ष माणिकराव ठाकरे, जिल्हा काँग्रेस कमिटी (ग्रामीण) चे अध्यक्ष हिदायत पटेल, मदन भरगड, सुधाकर गणगणे, लक्ष्मण तायडे, बाबाराव विखे पाटील, हेमंत देशमुख, महेश गणगणे, साजिद खान पठाण, अजहर हुसेन, रमाकांत खेतान, अनंत बगाडे, राजू चितलांगे, राजेश भारती, विष्णू मेहरे, कपिल रावदेव, प्रदीप वखारिया, उषा विरक, राजेश पाटील, राजेंद्र चितलांगे यांची तसेच महिला काँग्रेसच्या साधना गावंडे, डॉ. वर्षा बडगुजर, उषा विरक, स्वाती देशमुख, सीमा ठाकरे, पुष्पा गुलवाडे, मोहिनी मांडलेकर, सुनीता धुरंधर, स्वाती देशमुख, नंदा मानकर, जयश्री देशमुख, संजीवनी बिहाडे यांच्यासह काँग्रेसचे कार्यकर्ते बहुसंख्येने सहभागी झाले होते.