तीनपट कर आकारणीच्या विरोधात भाजपचा शंखनाद

महापालिकेत विशेष सभेचे होणार आयोजन.

अकोला: अकोलेकरांना साध्या मूलभूत सुविधा उपलब्ध करून देण्यास अपयशी ठरलेल्या महापालिका प्रशासनाने भांडवली मूल्यावर आधारित कर प्रणालीच्या माध्यमातून नागरिकांवर तब्बल तीनपट कर आकारणीचा प्रस्ताव तयार केला. हा विषय ह्यलोकमतह्णने सतत लावून धरल्यानंतर बुधवारी सत्ताधारी भाजपने वाढीव कर आकारणीच्या विरोधात शंखनाद फुंकला. या विषयावर २ सप्टेंबर रोजी विशेष सभा आयोजित करण्याचा निर्णय महापौर उज्ज्वला देशमुख यांनी घेतला आहे. महापालिकेने मागील १७ वर्षांपासून शहरातील मालमत्तांचे पुनर्मूल्यांकन का केले नाही, असा प्रश्न उपस्थित होते. आजपर्यंत मनपाच्या तिजोरीला ओरबडणार्‍या कर्तव्यतत्पर प्रशासनाने कर्मचार्‍यांच्या वेतनाची समस्या कायमस्वरूपी निकाली काढण्यासाठी पुनर्मूल्यांकन मोहीम सुरू केली. अकोलेकरांना नियमित कर आकारणी केल्यास मनपाला किमान ३५ ते ४0 कोटी रुपयांचे उत्पन्न प्राप्त होऊ शकते. अशास्थितीत आयुक्त सोमनाथ शेटे यांनी भांडवली मूल्यावर आधारित कर प्रणाली लागू करण्याचा प्रस्ताव दामटला. तर इतर अधिकार्‍यांनी कर्मचार्‍यांना वेतनाच्या मुद्यावर दिवास्वप्न दाखवणे सुरू केले. भांडवली मूल्यावर कर आकारणी केल्यास अकोलेकरांवर तीनपट कर लादल्या जाणार, हे निश्‍चित आहे. त्या बदल्यात नागरिकांना मूलभूत सुविधा मिळतील का, या मुद्यावर प्रशासनाची बोलती बंद होते. तीनपट कर आकारणीचा प्रस्ताव आयुक्तांच्या स्वाक्षरीसाठी मनपात पडून असल्याचे वृत्त लोकमतने प्रकाशित केल्यानंतर सर्वपक्षीय नगरसेवकांच्या पायाखालची वाळू सरकली. अखेर हा प्रस्ताव रद्द करण्यासाठी सत्तापक्ष भाजपने पुढाकार घेत, २ सप्टेंबर रोजी सकाळी ११ वाजता विशेष सभेचे आयोजन केले आहे. यासोबतच खुले नाट्यगृहानजीकच्या १२ दुकानांचे नवनिर्माण करण्याच्या विषयाला परवानगी देऊन मंजुरीसाठी जिल्हाधिकार्‍यांकडे पाठविल्या जाणार आहे. यानंतर दुपारी १ वाजता १४ ऑगस्ट रोजीच्या स्थगित सर्वसाधारण सभेचे आयोजन केले जाईल.