विषय मंजूर करण्यासाठी २४ लाखांत ‘सेटिंग’!

अकोला मनपातील प्रकार; ४८ नगरसेवकांचे खिसे भरले?

अकोला: तब्बल ५0 दिवसांच्या प्रदीर्घ कालावधीनंतर आयोजित केल्या जाणार्‍या स्थगित सर्वसाधारण सभेतील महत्त्वपूर्ण विषयांना मंजुरी देण्यासाठी सत्ताधार्‍यांनी ४८ नगरसेवकांची जुळवाजुळव करीत २४ लाखांत ह्यसेटिंगह्ण केल्याची माहिती आहे. बुधवारी महापौरांच्या दालनात पार पडलेल्या गटनेत्यांच्या बैठकीत केवळ आर्थिक विषयावर चर्चा झाली. मालमत्तांचे पुनर्मूल्यांकन करण्यासाठी जीआयएस प्रणाली कार्यान्वित करणे, सात सिमेंट काँक्रीट रस्त्यांच्या कामाला मंजुरी देणे, शहर बससेवा सुरू करणे, तसेच मोर्णा धरणापासून काटेपूर्णा प्रकल्पापर्यंत नवीन जलवाहिनीच्या प्रस्तावाला मंजुरी देण्यासाठी महापौर उज्ज्वला देशमुख यांनी २७ मे रोजी सर्वसाधारण सभेचे आयोजन केले होते. नगरसेवकांच्या संख्याबळाअभावी ही सभा स्थगित करावी लागली होती. ५0 दिवसांच्या प्रदीर्घ विश्रांतीनंतर सत्तापक्ष भाजपने अंतर्गत कलहाला पूर्णविराम देत, सभेतील विषयाचे अर्थपूर्ण नियोजन केल्याची चर्चा आहे. मागील आठवडाभरात मनोमिलनाचे सोपस्कार पार पडल्यानंतर सभेचा मुहूर्त (१६ जुलै) निश्‍चित करण्यात आला. अर्थातच, पक्षातील नगरसेवकांसह विरोधी पक्षातील नगरसेवकांची मर्जी सांभाळण्यासाठी योग्य नियोजन करण्यात आले. याकरिता ४८ नगरसेवक निश्‍चित होऊन, त्यांना विषयानुसार प्रत्येकी ५0 हजार रुपयांचा मोबदला अदा केला जाणार आहे. विकास कामांचा दर्जा कसा राहील, यावर चर्चा करण्यापेक्षा खिशात किती रक्कम जमा होईल, यावरच गटनेत्यांच्या बैठकीत चर्चा करण्यात आली.