केडगाव : कोरोनाची भीती संपत नाही तोच नगर तालुक्यात चोरट्यांनी घबराट निर्माण केली आहे. जेऊर, वाळकी, गुंडेगाव येथे धाडसी चोऱ्यांचे प्रकार घडत असल्याने नगर तालुक्यात चोरट्यांचा धुमाकूळ सुरू आहे.
नगर तालुक्यातील जेऊर परिसरात शनिवारी (दि.१७) पहाटेच्या सुमारास चोरट्यांनी धुमाकूळ घालत अडीच तोळे सोने व रोख रक्कम ६ हजार रुपये लंपास केले आहेत.
महावितरण कंपनीच्या चौकातील अंतोन पाटोळे यांच्या घराचा दरवाजा तोडून ही चोरी झाली. पाटोळे कुटुंब जागे झाल्याने त्यांना शस्त्रांचा धाक दाखवून चोरी करण्यात आली. त्यानंतर चोरट्यांनी मोर्चा श्रीधर तवले यांच्या वस्तीकडे वळविला. तिथे त्यांचा मुलगा राजू तवले जागा झाल्याने चोरट्यांनी तेथून पोबारा केला. चोरी करताना एका चोराला जबर दुखापत झाली. एमआयडीसी पोलीस ठाण्याचे सहायक पोलीस निरीक्षक युवराज आठरे, पोलीस हवालदार रमेश थोरवे, पोलीस कॉन्स्टेबल संदीप आव्हाड यांनी घटनास्थळी भेट दिली.
वाळकी येथील कापड दुकान फोडून चोरट्यांनी सव्वा लाखाचे कपडे लांबविले. ही घटना बुधवारी (दि.१४) रात्रीच्या सुमारास घडली होती. चोरीची दुसरी घटना गुंडेगावातील हराळ मळा येथे घडली. किराणा दुकान फोडून १० हजार रुपये व १२ हजार रुपये किमतीची मोटारसायकल असा एकूण २२ मुद्देमाल लंपास केला. ही घटना मंगळवारी (दि.१३) मध्यरात्री एकच्या सुमारास घडली. वाळकी, गुंडेगाव परिसरात चोरीच्या प्रकारात वाढ होत आहे. यामुळे परिसरात चोरट्यांची दहशत निर्माण झाली असून व्यापारी, व्यावसायिक, नागरिकांमध्ये घबराटीचे वातावरण पसरले आहे.
वाळकीतील अमोल तुकाराम झोंड यांच्या कापड दुकानातील ७० प्रकारचे विविधरंगी कपडे एकूण १०७ नग कपडे चोरांनी लांबविले. याची किंमत १ लाख २३ हजार ११२ रुपये आहे. वाळकी येथे यापूर्वीही मोबाइल दुकान, स्वीट होम दुकान फोडण्याच्या घटना घडल्या आहेत. गुंडेगावच्या हराळ मळा येथील नानासाहेब रंगनाथ हराळ यांचे किराणा दुकान मध्यरात्री एकच्या सुमारास चोरट्यांनी फोडून रोकडसह दुचाकीची चोरी केली.
-----
वाळकीत हॉटेल फोडून दारूची चोरी
वाळकी येथील राजहंस हॉटेल फोडून चोरट्यांनी दारूच्या बाटल्या लंपास केल्या. दोन दिवसांपूर्वीच वाळकीत चोरीच्या घटना घडलेल्या असताना पुन्हा हॉटेल फोडण्याचे धाडस चोरट्यांनी केले.