सुपा : पारनेर तालुक्यातील सुपा एमआयडीसी झपाट्याने विकसित होत असून येथे कंपन्यांची संख्या वाढत आहे. येथील उत्पादित माल, कच्चा माल यांच्या वाढत्या वाहतूक खर्चावर मात करण्यासाठी एमआयडीसीला आता रेल्वेची गरज आहे. येथून अवघ्या १५ किमी अंतरावर असणाऱ्या रांजणगाव रोड येथून सुप्यापर्यंत सायडिंग लाइन टाकता येणे शक्य असून मालधक्का सुरू केल्यास येथील उद्योग आणखी वाढून रोजगार संधीतही वाढ होईल. त्यासाठी पाठपुराव्याबरोबरच राजकीय पाठबळ, संघटित मागणीचा रेटा, स्थानिक कार्यकर्त्यांबरोबरच एमआयडीसीच्या सहकार्याचीही गरज आहे.
जुन्या औद्योगिक वसाहतीबरोबरच विस्तारित एमआयडीसीत कारखाने वाढले असून लवकरच जपानी पार्कमध्येही नव्याने ३ कारखाने सुरू होणार आहेत. सध्या कॅरिअर मायडिया, मिंडा, केएसपीजी या विस्तारित एमआयडीसीतील कारखान्यांबरोबरच जुन्या औद्योगिक वसाहतीतील जाफा हा पशुखाद्य निर्मिती प्रकल्प, आम इंडिया, अकॉर्ड, गणराज इस्पात, ईपीटॉम, शंकेश्वर फूड प्रॉडक्ट अशा अनेक नामवंत कंपन्या कार्यरत आहेत. या कारखान्यांना लागणारा कच्चा माल रस्त्यावरून येतो. तसाच तयार झालेला माल ही ट्रान्सपोर्ट व्यावसायिकांच्या माध्यमातून बाजारपेठेत पाठविला जातो. सध्या पेट्रोल डिझेलच्या दरात मोठी दरवाढ झाल्याने वाहतूक खर्चातही वाढ झाली. कच्च्या मालाची वाहतूक, उत्पादन खर्च, नंतर माल बाजारपेठेत पाठविला जातो. त्यासाठीचा खर्च वाढल्याने परिणामी उत्पादित वस्तूची किंमत वाढण्यावर होतो.
त्यामुळे येथील एमआयडीसीसाठी रांजणगाव रोडपासून सायडिंग रेल्वे लाइन प्रकल्प होणे आवश्यक आहे. यामुळे देशाच्या कोणत्याही भागातून कारखान्यांसाठी लागणार कच्चा माल वाजवी खर्चात आयात करता येईल. तसेच उत्पादित माल तातडीने वेळेत कमी खर्चात बाजारपेठेत पाठविणे शक्य होईल, असे सुपा कारखानदार संघटनेचे अध्यक्ष अनुराग धूत यांनी सांगितले.
एमआयडीसी ते रांजणगाव रोड असे १५ किमीचे अंतरही कमी आहे. त्यासाठीचा खर्चही फारसा नाही. ही रेल्वे लाइन टाकणे सर्वांच्याच हिताचे ठरणार असल्याने याबाबत तातडीने कार्यवाही करण्याची मागणी वाघुंडे बुद्रुकचे सरपंच संदीप वाघमारे, वाडेगव्हाणचे सरपंच बाळासाहेब सोनवणे, कडूसच्या माजी सरपंच पूनम मुंगसे, उद्योजक संजय तरटे, आपधूपचे सरपंच अजिंक्य गवळी, वाळवणे गावचे उपसरपंच सचिन पठारे, अण्णासाहेब हजारे युवा मंचचे अध्यक्ष राहुल शिंदे, वाघुंडे बुद्रुकचे माजी सरपंच संदीप मगर यांनी केली आहे.
----
रांजणगाव रोड ते सुपा एमआयडीसी या सायडिंग रेल्वे लाइनच्या कामासंदर्भात रेल्वे खात्याच्या संबंधित अधिकाऱ्यांशी चर्चा करणार असून या मार्गाचा सर्व्हे करण्यासाठी सूचना देण्यात येतील.
- सुजय विखे, सदस्य, अहमदनगर लोकसभा मतदारसंघ
----
रांजणगाव रोड ते सुपा एमआयडीसी हा मालवाहतुकीसाठी उपयुक्त रेल्वे मार्ग तयार झाला आहे. एमआयडीसीचा आणखी झपाट्याने विस्तार होऊन अनेक बेरोजगार मित्रांना त्याद्वारे नोकरी व्यवसायाच्या संधी निर्माण होतील. त्यासाठी राज्य सरकारच्या माध्यमातून लागणारी मदत करण्यात येईल.
- नीलेश लंके, सदस्य, पारनेर-नगर विधानसभा मतदारसंघ