रेल्वे स्थानकावरील प्लॅटफॉर्म तिकिटाचे दर स्थिर !

रोहित टेके

लोकमत न्यूज नेटवर्क

कोपरगाव : कोरोनामुळे गेल्या दीड वर्षात सर्वच जनजीवन विस्कळीत झाले आहे. त्याचा सर्वच क्षेत्रावर विपरित परिणाम झालेला आहे. त्याचा थेट फटका रेल्वेलादेखील बसला आहे. त्यामुळे अनेक रेल्वे स्थानकाच्या प्लॅटफॉर्म तिकिटाचे दर ३० ते ५० रुपये, तर पार्किंगचे दर १० ते ४० रुपयांपर्यंत आकारले जात आहेत. मात्र, कोपरगाव रेल्वेस्थानकाचे प्लॅटफॉर्म तिकिटाचे दर प्रति व्यक्ती १० रुपये, तर पार्किंगचा दर १० ते २० रुपयांपर्यंत आकाराला जात आहे. त्यामुळे रेल्वे स्थानकावर पोहोचविण्यासाठी जाणाऱ्या नातेवाइकांना तूर्तास तरी दिलासा मिळत आहे. विशेष म्हणजे गेली अनेक वर्ष हे सर्व दर स्थिर आहेत.

कोपरगाव रेल्वेस्थानक हे तालुक्याच्या ठिकाणी आहे. या स्थानकावरून मनमाड, तसेच दौंडच्या दिशेने दररोज ३० पेक्षा जास्त एक्स्प्रेस गाड्या धावत आहेत, तर पॅसेंजर रेल्वे बंद आहेत. या एक्स्प्रेसतून कोपरगाव स्थानकावरून दररोज हजारोंच्या संख्येने प्रवासी प्रवास करतात. परंतु, कोरोनामुळे गर्दी न करण्याचे प्रशासनाच्या सूचना असल्याने या स्थानकावर प्रवाशांना सोडण्यासाठी येणाऱ्याची संख्या कमालीची घटली आहे. त्यामुळे प्लॅटफॉर्म तिकीट, तसेच पार्किंग ठेकेदारांचे उत्पन्न मोठ्या प्रमाणात घटले आहे.

..........

तिकीट

प्लॅटफॉर्म तिकीट प्रतिव्यक्ती - १० रुपये

पार्किंग तिकीट : दुचाकी १० रुपये, चारचाकी २० रुपये

................

प्लॅटफॉर्म तिकिटातून रेल्वेची कमाई

कोरोनामुळे रेल्वेस्थानकावर नातेवाइकांना पोहोचविण्यासाठी येणाऱ्यांची संख्या घटली आहे. त्यामुळे २४ तासांत २० ते २५ प्लॅटफॉर्म तिकीट घेतले जातात. यातून दोनशे ते अडीचशे रुपयांचे रेल्वेला उत्पन्न मिळते.

..........

प्रत्येक रेल्वे स्थानकाचे प्लॅटफॉर्म तिकिटाचे दर वेगवेगळे असतात. त्याचा निर्णय वरिष्ठ पातळीवर होत असतो. कोपरगाव रेल्वे स्थानकावर प्लॅटफॉर्म तिकिटासाठी प्रतिव्यक्ती दहा रुपये आकारले जातात. तसेच तपासणीत जर कुणी विनातिकीट आढळला तर त्यास २५० ते १००० पर्यंत दंड केला जातो.

- अनुरंजन कुमार, वरिष्ठ तिकीट परीक्षक, रेल्वे स्थानक, कोपरगाव