पिंपळगाव माळवी : नगर तालुक्यातील पिंपळगाव माळवी येथील तब्बल सातशे एकरवर पसरलेला तलाव सलग दुसऱ्या वर्षीही तुडुंब भरला असून, सोमवारी संध्याकाळी तलावाच्या सांडव्यातून पाणी बाहेर पडण्यास सुरुवात झाली. हा तलाव भरल्यामुळे पिंपळगाव माळवी पंचक्रोशीतील शेतकऱ्यांमध्ये समाधानाचे वातावरण आहे.
नगर शहरापासून अवघ्या सोळा किलोमीटर अंतरावर पिंपळगाव माळवी येथे महानगरपालिकेचा साठवण तलाव आहे. ब्रिटिशकाळात १९२० साली हा तलाव पूर्ण होऊन यामधून नगर शहराला पाणीपुरवठा होत होता. १९९७ सालापर्यंत या तलावातून नगर शहराला पाणीपुरवठा सुरू होता. परंतु, मुळा धरणापासून नवीन पाइपलाइनपासून या तलावातील पाण्याचा नगर शहराला पुरवठा बंद झाला. या तलावातील पाण्यावर पिंपळगाव माळवी, डोंगरगण मांजरसुंबा व जेऊर या गावच्या पाणीपुरवठा योजना अवलंबून आहेत.
तलाव भरल्यामुळे परिसरातील पिण्याचे पाणी व शेतीच्या पाण्याची दोन वर्ष चिंता मिटली आहे. परिसरात बरेचसे आदिवासी कुटुंब मासेमारी करून उदरनिर्वाह करतात. त्यांचा रोजगाराचा प्रश्न मिटला आहे. या तलावाकडे महानगरपालिकेचे पूर्णपणे दुर्लक्ष झाले असून, तलावाच्या भिंतीवर मोठमोठी झाडे वाढली आहेत. त्यामुळे भिंतीला धोका निर्माण झाला आहे. या तलाव परिसराची पूर्ण स्वच्छता केल्यास येथे सुंदर पर्यटनस्थळ निर्माण होऊ शकते. पूर्वीच्या काळी या तलावामध्ये नौकाविहाराची सोय होती व शहरातील पर्यटक नियमित येत असत. या तलाव परिसराचा पर्यटनस्थळ म्हणून विकास केल्यास मोठ्या प्रमाणात रोजगार निर्माण होऊ शकतो.
----
फोटो आहे
070921\0753img_20210907_124938.jpg
पिंपळगाव माळवी येथील तलाव ओव्हरफ्लो झाला असून सांडव्यातून पाणी बाहेर पडत आहे .
छायाचित्र : खासेराव साबळे