अहमदनगर : पेट्रोलपंपांवर दरोडे टाकून लुटणारी टोळी स्थानिक गुन्हे शाखेने जेरबंद केली असून, त्यांच्याकडून १ लाख ८० हजार रुपये किमतीच्या तीन मोटारसायकली जप्त केल्या आहेत. आरोपींवर यापूर्वीही खुनासह इतर अनेक गुन्हे दाखल आहेत.
नगर-सोलापूर रस्त्यावर असलेल्या साकत (ता. नगर) शिवारातील केतन पेट्रोलपंपावर १ ॲागस्ट रोजी सात ते आठ दरोडेखोरांनी दरोडा टाकून पेट्रोल पंपावरील कर्मचारी, तसेच तेथे उभे असलेल्या ट्रक चालक यांना मारहाण करून पिस्टला धाक दाखवत मोबाईल, रोख रक्कम असा २ लाख ५५ हजार ८०० किमतीचा ऐवज चोरून नेला. याबाबत नगर तालुका पोलीस ठाण्यात गुन्हा दाखल आहे. याशिवाय ११ ॲागस्टला नगर-सोलापूर रोडवर थेरगाव फाटा (ता. कर्जत) येथील फाळके पाटील ॲण्ड सन्स या भारत पेट्रोलपंपावर अज्ञात चोर आरोपींनी दरोडा टाकून तेथील कर्मचाऱ्यांना मारहाण केली व ९९ हजार ५०० रुपये रोख रक्कम व चार मोबाईल असा एकूण १ लाख २३ हजार ५०० रुपये किमतीचा ऐवज चोरून नेला. याप्रकरणी कर्जत पोलीस ठाण्यात गुन्हा दाखल झाला आहे.
अकरा दिवसांत दोन पेट्रोलपंप लुटल्याने पोलीस अधीक्षकांच्या मार्गदर्शनाखाली स्थानिक गुन्हे शाखेेने या प्रकरणी तपास सुरू केला. निरीक्षक अनिल कटके व त्यांच्या पथकाने कसून तपास करीत या गुन्ह्यांतील काहींची नावे निष्पन्न केली. परंतु, आरोपी वारंवार राहण्याचे ठिकाण बदलून पसार होत होते. त्याचवेळी पथकाला माहिती मिळाली की, हे आरोपी त्यांच्या गावी हातोळण (ता. आष्टी) येथे आले आहेत. त्यानुसार पथकाने हातोळण येथे सापळा लावून आरोपी कृष्णा विलास भोसले (वय २२), रावसाहेब विलास भोसले (४०) व अजिनाथ विलास भोसले (२५, तिघे, रा. हातोळण, ता. आष्टी), सुरेश पुंजाराम काळे (३८, सोनवीर, ता. शेवगाव) यांना शिताफीने ताब्यात घेतले. प्रथम आरोपींनी उडवाउडवीची उत्तरे दिली; मात्र कसून चौकशी केली असता त्यांनी हा गुन्हा इतर तीन साथीदारांच्या मदतीने केल्याची कबुली दिली. त्यानुसार इतरांचा शोध घेतला असता ते मिळून आले नाहीत. ताब्यात घेतलेल्या आरोपींकडून १ लाख ८० हजार रुपये किमतीच्या विना क्रमांकाच्या तीन मोटारसायकली जप्त करण्यात आल्या आहेत.
-------------
आरोपींवर पूर्वीचे गुन्हे दाखल
यातील आरोपींवर यापूर्वी खून, मोक्का, दरोडा, जबरी चोरी, घरफोडी, चोरी, मारामारी असे अनेक गुन्हे आष्टी, पुणे, श्रीगोंदा, जामखेड, नगर तालुका, एमआयडीसी, आदी पोलीस ठाण्यात गुन्हे दाखल आहेत.
-------------
फोटो- १६एलसीबी
पेट्रोलपंपांवर दरोडे टाकून लुटणारी टोळी स्थानिक गुन्हे शाखेने जेरबंद केली.