कोपरगाव : मुलीने वारंवार विरोध करूनही आईच्या मनाविरुद्ध आंतरजातीय विवाह केल्याचा राग आल्याने आईचे थेट मुलीच्या सासरचे घर गाठून तिच्या घरातच विषारी द्रव प्राशन करून आत्महत्या करण्याचा प्रयत्न केल्याचा धक्कदायक प्रकार घडला.
ही घटना कोपरगाव तालुक्यातील दहिगाव बोलका येथे शुक्रवारी (दि.२५) सायंकाळी ७ वाजेच्या सुमारास घडली. याप्रकरणी यशोदा प्रतीक कुलकर्णी (वय २७, रा.दहेगाव बोलका, ता.कोपरगाव ) हिने आपली आई सुमनबाई पंडितराव थोरे (वय ५०, रा.जांमळवाडी रोड, सिद्धिविनायक सोसायटी, ऐश्वर्या हाईट फ्लॅट नं. ०१ कात्रज, पुणे) हिच्याविरुद्ध कोपरगाव तालुका पोलीस ठाण्यात रविवारी (दि.२७) फिर्याद दिली. त्यावरून गुन्हा दाखल केला आहे. तपास पोलीस निरीक्षक दौलतराव जाधव यांच्या मार्गदर्शनाखाली पोलीस हेड कॉन्स्टेबल राजेंद्र म्हस्के करीत आहेत. दरम्यान, सुमनबाई थोरे यांच्यावर कोपरगाव येथील एका रुग्णालयात उपचार सुरू असून त्यांची प्रकृती स्थिर आहे.