महापौरांनी केली दुप्पट निधीची मागणी

लोकमत न्यूज नेटवर्क

अहमदनगर : जिल्हा नियोजन समितीकडून दिल्या जाणाऱ्या निधीत दुप्पट वाढ करावी, अशी मागणी महापौर रोहिणी शेंडगे यांनी जिल्हाधिकारी राजेंद्र भोसले यांच्याकडे केली आहे.

महापौर राेहिणी शेंडगे यांच्या नेतृत्वाखालील शिष्टमंडळाने जिल्हाधिकारी भोसले यांची भेट घेतली. यावेळी दलित सुधार योजना, दलितेतर वस्ती सुधार योजना आणि सुवर्ण जयंती नगरोत्थान अभियानांतर्गत महापालिकेला प्रत्येकी ५ कोटींचा निधी मिळतो. परंतु, सध्या कोरोनाचे संकट आहे. महापालिकेचा सर्वाधिक निधी कोरोनाच्या उपाययोजना करण्यात खर्च होत आहे. त्यामुळे विकासकामांसाठी निधी उपलब्ध होत नाही. परिणामी शहरातील रस्त्यांची दुरवस्था झाली आहे. रस्त्यांसह विविध विकासकामांसाठी निधी जिल्हा नियोजन समितीकडून उपलब्ध करून देण्यात यावा, अशी मागणी निवेदनाव्दारे महापौर शेंडगे यांनी केली आहे.

......................

असा मिळतो निधी

दलित वस्ती सुधार योजना- ५ कोटी

दलितेतर वस्ती सुधार योजना- ५ कोटी

सुवर्ण जयंती नगरोत्थान अभियान- ५ कोटी