लोकमत न्यूज नेटवर्क
अहमदनगर : कोरोनाच्या प्रादुर्भावामुळे गेल्या दोन महिन्यांपासून एसटी बस एकाच जागेवर उभ्या आहेत. त्यामुळे एकीकडे या बसेसचा मेंटेनन्स खर्च तर वाढला आहे, दुसरीकडे बस बंद असल्याने नगर विभागाचे दररोज ७० लाख याप्रमाणे दोन महिन्यांत सुमारे ४२ कोटींचे उत्पन्न बुडाले आहे.
सर्वच जिल्ह्यात जवळपास वर्षभरापासून कधी बसेस बंद तर कधी काही प्रमाणात सुरू राहिल्या आहेत. त्यामुळे अनेक आगारांत अनेक बस वर्षभरापासून एकाच ठिकाणी उभ्या आहेत. त्यामुळे बसवरील मेंटेनन्सचा खर्च वाढला आहे.
नगर जिल्ह्यात एसटीचे विभागीय कार्यालय असून, त्या अंतर्गत ११ आगारे आहेत. विभागात एकूण ७०० एसटी बस आहेत. मागील वर्षी मार्च २०२० मध्ये लाॅकडाऊन सुरू झाल्यापासून बस एकाच जागेवर उभ्या होत्या. पुढे मे २०२०मध्ये परप्रांतीयांना राज्य सीमेवर सोडण्यासाठी काही बस वापरल्या. नंतर जून २०२० पासून पूर्ण क्षमतेने बस सुरू झाल्या. तरीही खेडोपाडी बस सोडण्यात येत नव्हत्या. साधारण ८० टक्के फेऱ्या सुरू झाल्या होत्या.
दरम्यान, राज्यात दुसरी लाट आल्यानंतर ४ एप्रिल २०२१ पासून पुन्हा बस बंद झाल्या. तेव्हापासून म्हणजे गेल्या दोन महिन्यांपासून बस आपापल्या आगारात उभ्या आहेत. त्यामुळे एसटीचे सुमारे ४२ कोटींचे उत्पन्न या दोनच महिन्यात बुडाले आहे.
--------------
जिल्ह्यातील आगार - ११
एकूण बसेस - ७००
--------
दोन महिन्यांपासून बस नाही रस्त्यावर
मागील वर्षभरात म्हणजे जून २०२० पासून १० महिने एसटी बस कमी-अधिक प्रमाणात सुरू होत्या. दुसऱ्या लाटेनंतर म्हणजे ४ एप्रिल २०२१ पासून जिल्ह्यातील बस बंद आहेत. केवळ तालुक्यातून एक किंवा दोन बस दररोज जिल्हा ठिकाणी येतात व जातात.
----------
महिन्याला २ कोटी मेंटेनन्सवर खर्च
जिल्ह्यात ७०० बस असून, त्या आपापल्या आगारात उभ्या आहेत; परंतु त्या जागेवर उभा राहून खराब होऊ नये किंवा बॅटरी डिस्चार्च होऊ नये म्हणून दररोज काही वेळ बस चालू करून त्यांची जागा बदलली जाते, तसेच बॅटरीही चार्ज केली जाते. ॲायलिंग, तसेच इतरही काही खर्च आहे. असा एका बसवर रोज एक हजार रुपये खर्च होतो. त्यानुसार ७०० बसवर महिनाभरात सुमारे २ कोटींचा खर्च होतो.
----------
आधीच दुष्काळ...
आधीच तोट्यात असलेली एसटी कोरोनामुळे पुरती डुबली आहे. कोरोनाआधी नगर विभागात दररोज सरासरी ७० लाखांचे उत्पन्न एसटीला मिळत होते; परंतु गेल्या दोन महिन्यांत एसटी जागेेवर असल्याने या दोन महिन्यांतच सुमारे ४२ कोटी रुपयांचे उत्पन्न बुडाले आहे. शिवाय मागील वर्षभरातही प्रवाशांअभावी खूप कमी फेऱ्या एसटीला कराव्या लागल्या. त्यातही कोट्यवधींचे नुकसान झाले.
--------
कोरोनामुळे सध्या सर्व एसटी बस बंद आहेत. तालुक्यातून जिल्हा ठिकाणी तुरळक गाड्या सुरू असतात. नगर विभागाचे दररोजचे सरासरी ७० लाखांचे उत्पन्न असते. बस बंद असल्याने ते ७० लाखांचे उत्पन्न बुडत आहे.
- विजय गीते, विभागीय नियंत्रक, अहमदनगर.
--------
फोटो - ०२तारकपूर डेपो
नगर शहरातील तारकपूर आगारात उभ्या असलेल्या एसटी बस.