जवळे : येथील सिद्धेश्वर ओढ्यामध्ये महादेव मंदिरालगत सहा महिन्यांपूर्वी खोदकाम करून बांधकाम करण्यात आलेल्या विहिरीसाठी कोणतीही शासकीय परवानगी घेतलेली नाही. त्यासाठी निविदाही काढलेली नाही. यामध्ये जनतेपेक्षा स्वतःचे हित पाहिल्याचे लक्षात येते, असा आरोप जवळे (ता. पारनेर) येथील ग्रामस्थ भाऊसाहेब प्रकाश आढाव यांनी केला आहे. त्यामुळे संबंधित कामाची चौकशी करून योग्य ती कारवाई करावी, अशी मागणी त्यांनी केली आहे. ग्रामपंचायतीने खोदलेल्या विहिरीपासूनच पन्नास-साठ फुटांवर गावातील सांडपाणी जात आहे. त्यामुळे आज नाही तरी भविष्यात त्याचा दुष्परिणाम होऊ शकतो. हा विचार ग्रामपंचायतीने यापूर्वीच करायला हवा होता. त्यामुळे ते पाणी पिण्यास योग्य नसल्याचा शासकीय अहवालही प्राप्त झालेला आहे. १५ सप्टेंबरपासून विहिरीजवळच बेमुदत उपोषण करणार असल्याचे भाऊसाहेब आढाव यांनी प्रसिद्धीपत्रकात म्हटले आहे.
---
आता अचानक तक्रार का?
अनेक वर्षांपासून उन्हाळ्याचे चार ते पाच महिने गावाला पिण्याच्या पाण्याची टंचाई भासत असते. याबाबत ग्रामसभेत अनेकदा विषय झाला. या विहिरीबाबत मासिक सभेत कल्पना दिली होती. त्यानंतरच विहिरीचे काम केलेले आहे. त्यामुळे हे काम एकाच रात्रीत झालेले नसून जवळपास दोन महिने काम सुरू होते. त्या काळात एकाही ग्रामस्थाने या कामाबाबत तक्रार केली नाही. आता मात्र अचानक काय झाले माहीत नाही. त्यामुळे भाऊसाहेब आढाव यांच्या मागणीला योग्य ते उत्तर देऊ, असे सरपंच अनिता सुभाष आढाव यांनी सांगितले.