अहमदनगर : राज्य सरकारने ओबीसी आरक्षणाबाबत योग्य कार्यवाही न केल्याने राज्यात ओबीसी समाजाचे राजकीय आरक्षण संपुष्टात आले आहे. राज्यातील ओबीसी समाजावर हा मोठा अन्याय झाला आहे. या निषेधार्थ भाजपाच्या जिल्हा ओबीसी आघाडीच्यावतीने जिल्हाधिकारी कार्यालयासमोर निदर्शने करण्यात आली.
ओबीसी आघाडीचे प्रदेश उपाध्यक्ष प्रकाश चित्ते यांच्या नेतृत्वाखाली झालेल्या या आंदोलनात आ. बबनराव पाचपुते, माजी आमदार बाळासाहेब मुरकुटे, जिल्हाध्यक्ष संतोष रायकर, माजी नगराध्यक्ष अभय आगरकर, युवराज पोटे, ज्ञानेश्वर काळे, नारायण धोंगडे, आशा वाघ, संगीता घोडेकर, बाळासाहेब गाडेकर, अशोक गोरे, सचिन भैरवकर, सचिन पारखी, अनिल गट्टाणी आदींसह भाजपाच्या ओबीसी आघाडीचे सर्व तालुक्यांचे पदाधिकारी उपस्थित होते. यावेळी राज्य सरकारच्या विरोधात जोरदार घोषणाबाजी करत निषेध करण्यात आला.
यावेळी प्रकाश चित्ते म्हणाले, ‘‘लवकरात लवकर राज्य मागासवर्गीय आयोगाचे गठण करण्याचा आदेश सर्वोच्च न्यायालयाने राज्य सरकारला दिला होता; मात्र न्यायालयाच्या या आदेशाला आता जवळपास पंधरा महिने उलटून गेले आहेत. तरीही राज्य मागासवर्गीय आयोगाचे अधिकृत गठन झालेले नाही. भारतीय जनता पार्टी ओबीसी मोर्चाच्यावतीने अनेक वेळा राज्य सरकारला पत्र दिले; मात्र या सरकारला ओबीसी समाजाबद्दल काहीही देणे-घेणे नसल्याचे दिसते आहे. राजकीयदृष्ट्या ओबीसींना संपविण्याचा कट आघाडी सरकार करत आहे.’’
आ. बबनराव पाचपुते म्हणाले, ‘‘राज्यातील सरकार हे विकृतीने आलेले आहे. मराठा व ओबीसी समाजावर मोठा अन्याय करत आहे. मराठा व ओबीसींना आरक्षण मिळालेच पाहिजे. यासाठी आता आरपार लढाई देण्याची परिस्थिती निर्माण झाली आहे.’’
बाळासाहेब मुरकुटे म्हणाले, ‘‘माजी मुख्यमंत्री देवेंद्र फडणवीस यांनी चांगल्या प्रकारे कागदपत्रांची पूर्तता केली होती; मात्र राज्य सरकारने मराठा व ओबिसीबाबत चुकीचे निर्णय घेतल्याने अडचणीत आणले आहे. या उदासी सरकारने दोन्ही समाजांचे आरक्षण संपुष्टात आणले आहे.
-------------------------------------
फोटो - 03 bjp obc
भाजप ओबीसी आघाडीच्यावतीने गुरुवारी जिल्हाधिकारी कार्यालयवर निदर्शने करण्यात आली. यावेळी प्रदेश उपाध्यक्ष प्रकाश चित्ते, आ.बबनराव पाचपुते, बाळासाहेब मुरकुटे आदी.