सोनेतारण अपहारप्रकरणी शेवगाव पोलीस ठाण्यात शाखाधिकारी अनिल आहुजा यांनी दिलेल्या फिर्यादीवरून गोल्ड व्हॅल्युअर विशाल गणेश दहिवाळकर याच्यासह १५९ कर्जदारांविरोधात गुन्हा दाखल करण्यात आला आहे. या प्रकरणाचा आर्थिक गुन्हे शाखेच्या माध्यमातून तपास सुरू असून, पोलीस निरीक्षक अंबादास भुसारे हे तपासी अधिकारी आहेत. पोलिसांनी गुन्हा दाखल असलेल्या १५९ कर्जदारांना नोटीस बजावून त्यांचे जबाब नोंदविण्याचे काम सुरू केले आहे. आतापर्यंत १०० जणांचे जबाब पूर्ण झाले आहेत. तसेच बँकेतून सोनेतारण व्यवहाराचे रेकॉर्ड आल्यानंतर आणखी काही गोष्टी समोर येणार आहेत.
-----------------
अटकपूर्व जामिनासाठी अनेकांचे अर्ज
सोनेतारण प्रकरणात गुन्हा दाखल झाल्यानंतर अटकपूर्व जामिनासाठी अनेकांनी जिल्हा न्यायालयात अर्ज केला आहे. आमच्या नावावर सोनेतारण कर्जत घेतल्याचे आम्हाला माहितीच नाही, असा अनेक कर्जदारांचा दावा आहे. प्रत्यक्षात सत्य काय आहे ते पोलीस तपासातच समोर येईल.
-----------------
गोल्ड व्हॅल्युअरच सांगेल सत्य
पोलिसांत दाखल फिर्यादीवरून सोनेतारण अपहरात गोल्ड व्हॅल्युअरचा मोठा सहभाग असल्याचे दिसते. त्याला अटक झाल्यानंतर या अपहारात आणखी कुणाचा सहभाग आहे, हेही समोर येणार आहे. पोलीस मात्र गोल्ड व्हॅल्युअरला कधी अटक करणार हे पाहणे महत्त्वाचे ठरणार आहे.
-------------
बनावट सोन्यावर सव्वापाच कोटींचे कर्ज
अर्बन बँकेच्या शेवगाव शाखेतून २०१७ ते २९ जून २०२१ या कालावधीत १५९ जणांनी दोन हजार ७३५ ग्रॅम सोने गहाण ठेवून ५कोटी ३० लाख १३ हजार रुपयांचे कर्ज घेतले. मुदत संपल्यानंतरही या कर्जाची परतफेड न झाल्याने बँकेने गहाण असलेल्या सोन्याचा लिलाव केला. तेव्हा हे सोने बनावट असल्याचे समोर आले.