कोरोना विषाणूने दुसऱ्या लाटेत महामारीसारखे रौद्र रूप धारण केले आहे. परिणामी, आता नियम पाळणे महत्त्वाचे झाले आहे. मात्र, येथील खासगी कोविड सेंटर चालविणारे व हॉस्पिटलमध्येच असलेल्या मेडिकलमध्ये ग्राहकांची तोबा गर्दी होत आहे. यात सोशल डिस्टन्सचा फज्जा उडत आहे. यात कोरोना रुग्णाचे नातेवाईक व नेहमीच्या उपचारासाठी भरती असलेल्या रुग्णांचे नातेवाईक एकाचवेळी मेडिकलमध्ये औषधी खरेदी करण्यासाठी येत असल्याने गर्दी होत आहे. या गर्दीवर नियंत्रण कुणाचे, असा प्रश्न आहे.
आता ज्या खासगी कोविड सेंटरला कोरोना रुग्ण भरती करून उपचार करण्याची परवानगी दिली, त्या हॉस्पिटलमध्ये असलेल्या मेडिकलमध्ये रेमडेसिविर इंजेक्शनचा तुटवडा असल्याचे चित्र पहावयास मिळत आहे. अशा हॉस्पिटलमध्ये उपचार घेत असलेल्या रुग्णाला बाहेरून इंजेक्शन खरेदी करून आणावयास लावले जाते. कोविड सेंटरच्या हॉस्पिटलमध्ये असलेल्या मेडिकलमध्ये इंजेक्शनचा तुटवडा आहे. यामुळे रुग्णाच्या नातेवाईकांना नाहक त्रास सहन करावा लागत आहे.
शासनाच्या नियमाप्रमाणे सोयी-सुविधा उपलब्ध करून न देणाऱ्या हॉस्पिटलची उपविभागीय अधिकाऱ्यांनी अचानक भेट देऊन आढावा घ्यावा व कसूर करणाऱ्या हॉस्पिटलची मान्यता कायमस्वरूपी रद्द करण्यात यावी, अशी मागणी नातेवाईक करीत आहेत.