महागाव तालुक्यात शेतकऱ्याचा खून

तालुक्यातील अनंतवाडी येथील शेतकऱ्याचा खून झाल्याची घटना उघडकीस आली. सदर शेतकऱ्यावर महिनाभरापूर्वी

अनंतवाडीतील हल्ला : अज्ञाताविरुद्ध गुन्हा लोकमत न्यूज नेटवर्क महागाव : तालुक्यातील अनंतवाडी येथील शेतकऱ्याचा खून झाल्याची घटना उघडकीस आली. सदर शेतकऱ्यावर महिनाभरापूर्वी प्राणघातक हल्ला झाला होता. उपचारादरम्यान त्यांचा ६ जून रोजी मृत्यू झाला. महागाव पोलिसांनी अज्ञाताविरुद्ध खुनाचा गुन्हा नोंदविला. श्रावण तुकाराम हनवते (४५) रा.अनंतवाडी असे मृत शेतकऱ्याचे नाव आहे. श्रावण हनवते ११ मे रोजी सायंकाळी ज्वारीच्या राखणीसाठी शेतात गेले होते. नेहमीप्रमाणे त्या दिवशीही ते शेतात पोहोचले. मात्र दुसऱ्या दिवशी सकाळ होवूनही ते जागलीवरून घरी परतले नाही. त्यामुळे त्यांच्या जावयाने शेताकडे धाव घेतली. ते शेतात पोहोचल्यानंतर त्यांना श्रावण हनवते रक्ताने माखलेल्या अवस्थेत आढळून आले. त्यांनी लगेच कुटुंबीयांना माहिती देवून श्रावण हनवते यांना तातडीने पुसद येथील रुग्णालयात उपचारासाठी दाखल केले. त्यांच्या डोक्याला जबर मार असल्याने नंतर त्यांना नांदेड येथील एका खासगी रुग्णालयात हलविण्यात आले होते. जवळपास महिनाभर नांदेड येथील रुग्णालयात श्रावण हनवते यांच्यावर उपचार सुरू होते. शेवटपर्यंत ते बेशुद्धावस्थेत होते. डोक्याला जादा मार असल्याने त्यांच्या मेंदूतून रक्तस्त्राव सुरू होता, असे डॉक्टरांनी कुटुंबीयांना सांगितले. महिनाभर उपचार करूनही श्रावण हनवते यांनी उपचारांना प्रतिसाद दिला नाही. अखेर ६ जून रोजी उपचारादरम्यानच त्यांचा मृत्यू झाला. या प्रकरणी त्यांचे भाऊ उत्तम हनवते यांनी महागाव पोलिसात तक्रार दिली. तक्रारीवरून अज्ञात आरोपीविरुद्ध खुनाचा गुन्हा नोंदविल्याचे ठाणेदार करीम मिर्झा यांनी सांगितले.