जि.प.पोटनिवडणूक : कोरोनास्थितीचा अहवाल पाठविला!

संतोष वानखडे

वाशिम : स्थगित असलेली जिल्हा परिषद व पंचायत समितीची पोटनिवडणूक आणखी लांबणीवर टाकायची की कोरोना नियंत्रणात असल्याने स्थगिती उठवायची? याबाबतचा निर्णय घेण्यासाठी राज्य निवडणूक आयोगाने जिल्हाधिकाऱ्यांकडून जिल्ह्यातील कोरोना स्थितीचा अहवाल मागविला होता. त्यानुसार जिल्हाधिकाऱ्यांनी हा अहवाल पाठविला असून, जि.प. गट व गणात केवळ दोन रुग्ण सक्रिय असल्याने स्थगिती उठणार की पोटनिवडणूक आणखी लांबणीवर पडणार? याकडे जिल्हावासीयांचे लक्ष लागून आहे.

वाशिम जिल्हा परिषदेचे ५२ गट आणि जिल्ह्यातील सहा पंचायत समित्यांच्या १०४ गणांसाठी ७ जानेवारी २०२० रोजी निवडणूक झाली होती. दरम्यान, स्थानिक स्वराज्य संस्थांमध्ये ५० टक्क्यांपेक्षा जास्त आरक्षण होत असल्याने, यासंदर्भात दाखल याचिका निकाली काढताना सर्वोच्च न्यायालयाने ओबीसी प्रवर्गातील आरक्षण क्षमतेपेक्षा अधिक झाल्याचा मुद्दा समोर करून संबंधित सदस्यांचे सदस्यत्व रद्द करून पुन्हा निवडणूक घेण्याचा आदेश दिला होता. त्यानुसार जिल्हा परिषदेचे १४ गट आणि पंचायत समित्यांच्या २७ गणांच्या सदस्यांची सदस्यत्व रद्द झाले असून, या रिक्त पदांसाठी १९ जुलै रोजी पोटनिवडणूक होणार होती. दरम्यान, कोरोना प्रादुर्भावाच्या पार्श्वभूमीवर राज्य निवडणूक आयोगाच्या ९ जुलैच्या आदेशानुसार पोटनिवडणुकीच्या कार्यक्रमास स्थगिती देण्यात आली. आता कोरोनाचा प्रादुर्भाव कमी होत असल्याने, राज्य निवडणूक आयोगाने जिल्हाधिकाऱ्यांकडून जिल्हा परिषदेचे गट आणि पंचायत समित्यांच्या गणांतील कोरोना प्रादुर्भावाची सद्य:स्थिती काय आहे, ॲक्टिव्ह रुग्णांची संख्या किती आहे, आदी परिस्थितीचा अहवाल मागविला होता. त्यानुसार कोरोनास्थितीचा अहवाल राज्य निवडणूक आयोगाकडे पाठविण्यात आला.

००००००००००००००००

दोन रुग्ण सक्रिय

जिल्ह्यात १४ जि.प. गट आणि २८ पं.स. गणात पोटनिवडणूक होणार आहे. या गट व गणात किती कोरोना सक्रिय रुग्ण आहेत, याचा अहवाल मागविण्यात आला होता. गोभणी जिल्हा परिषद गटात एक आणि पोहा पंचायत समिती गणात एक असे दोन रुग्ण सक्रिय आहेत. उर्वरित १३ जि.प. गट आणि २७ पं.स. गणात कोरोना रुग्ण नाहीत.

००००००००००००००००००

पोटनिवडणूक होण्याची शक्यता?

जिल्ह्यात सध्या कोरोना नियंत्रणात असल्याचे ॲक्टिव्ह रुग्णसंख्येवरून दिसून येते. केवळ दोन ठिकाणी कोरोना सक्रिय रुग्ण असल्याने पोटनिवडणुकीचा कार्यक्रम कोणत्याही क्षणी जाहीर होऊ शकतो, अशी चर्चा राजकीय क्षेत्रात रंगत आहे. पोटनिवडणूक होणार की आणखी लांबणीवर पडणार? याकडे राजकीय क्षेत्राचे लक्ष लागून आहे.