अलीकडच्या दहा वर्षांत स्मार्टफोन अनेकांच्या हाती आला आहे. या स्मार्ट फोनवर व्हॉटसॲप, फेसबुक, ट्विटर, इन्स्ट्राग्राम आदी सोशल मीडियाचा वापर सहज शक्य असल्याने अनेक जण वेळ घालविण्यासाठी, व्यक्त होण्यासाठी या सोशल मीडियाचा मनसोक्त वापर करतात. या मीडियावर काही समाजभान नसलेले आणि विघ्नसंतोषी लोकांचाही मोठा भरणा आहे. ही मंडळी जहाल, तीव, भडक, जातीय तेढ निर्माण करणाऱ्या शांतता भंग करणाऱ्या, वात्रट पोस्टच शेअर करण्यावर अधिक भर देते. यातील एकही पोस्ट तुमच्याकडून चुकून शेअर झाली, लाईक किंवा फॉरवर्ड झाली, तर तुमच्यावरही माहिती तंत्रज्ञान कायद्यान्वये गुन्हा दाखल होऊ शकतो.
----------
कोट: -सोशल मीडियाचा वापर सर्वांनी काळजीपूर्वक करावा. कोणत्याही अनोळखी व्यक्तीची फ्रेंड रिक्वेस्ट स्वीकारू नये, वात्रट, व्हल्गर पोस्टला लाइकही करू नये, या बाबीची पालन केल्यास तुम्ही सायबर गुन्ह्यापासून सुरक्षित राहू शकता.
-अजयकुमार वाढवे,
पोलीस निरीक्षक, सायबर विभाग, वाशिम
-------
बॉक्स : मुलींनो डीपी सांभाळा
काही तरुणी व्हॉटसॲपसारख्या सोशल मीडियावर आपले स्वत:चे छायाचित्र डीपी म्हणून ठेवतात. मात्र याच डीपीचा वापर करून सायबर गुन्हेगार अश्लील पोस्ट तयार करणे किंवा गैरवापर करून बदनामीचा प्रयत्नही करू शकतात. यामुळे तरुणींनी सावधगिरी बाळगणे गरजेचे असून, आपल्या छायाचित्राचा गैरवापर टाळण्यासाठी स्वत:चे छायाचित्र न ठेवता निसर्गचित्र, सुभाषितांची छायाचित्रे, ठेवणे कधीही योग्यच ठरते.
----------------
बॉक्स: सोशल मीडियाचा वापर करा जपून
एफबी, व्हॉट्सॲप आणि यू-ट्यूबच्या माध्यमातून वेगवेगळे प्रक्षोभक, अश्लील मेसेजेस शेअर होतात. अगदी शालेय विद्यार्थ्यांनाही व्हॉट्सॲप, फेसबुकचे जणू व्यसन लागले आहे. सोशल मीडियाच्या वापराने आपल्याला जगाशी कनेक्ट होता येते, पण त्याचा अतिवापर टाळण्याची गरज आहे. माहितीची सत्यता पडताळून जर ती शेअर केली तर, लोकांना चांगली आणि योग्य माहिती मिळू शकते.
-------
बॉक्स : अशी घ्या काळजी
सोशल मीडियाचा वापर करताना प्रायव्हसी सेटिंग्ज योग्यप्रकारे सेट करून नंतरच आपले फोटो किंवा मेसेज शेअर केले पाहिजेत. एखाद्या व्यक्तीला ब्लॉक करण्याचा पर्याय एफबी किंवा व्हॉट्सॲपवर उपलब्ध आहे. एखादी पोस्ट नको असल्यास ती काढून टाकली जाऊ शकते. मेसेज शेअर किंवा लाइक करताना आपण काही चुकीचं पाठवत नाही ना, याचे भान आपणच राखले पाहिजे.