वीजबिल वसुलीसाठी महावितरणची धडपड

माझे वीजबिल, माझी जबाबदारी अभियानांतर्गत आयोजित सायकल रॅलीची सुरुवात वाशिम मंडळाचे अधीक्षक अभियंता विजय मानकर यांच्या हस्ते हिरवी झेंडी दाखवून करण्यात आली. या रॅलीत वाशिम विभागाचे कार्यकारी अभियंता रत्नदीप तायडे, अतिरिक्त कार्यकारी अभियंता पी. के. चव्हाण, प्रकाश ढंगारे, व्यवस्थापक कुणाल गजभिये यांच्यासह संघटनेचे अनेक पदाधिकारी सहभागी झाले होते. वाशिम मंडळाची घरगुती, वाणिज्य, औद्योगिक ग्राहकांची थकबाकी ४९ कोटी, कृषीपंपांची थकबाकी १५० कोटी, पाणीपुरवठा योजनेची थकबाकी १० कोटी, स्ट्रीट लाईटची थकबाकी ८० कोटी असून एकूण थकबाकी ७८९ कोटी आहे. वीजबिलाच्या वाढत्या थकबाकीमुळे महावितरणची स्थिती अत्यंत बिकट झाली आहे. या पार्श्वभूमीवर वीजबिल वसुलीस वेग देण्यासह थकित वीजबिलाचा भरणा करण्यासाठी वीज ग्राहकांना प्रोत्साहित करण्याच्या उद्देशाने १६ मार्च रोजी महावितरण वाशिमकडून वाशिम शहरात सायकल रॅलीचे आयोजन करण्यात आले होते. या रॅलीत वीजबिल भरा, महावितरणला सहकार्य करा, माझे वीजबिल माझी जबाबदारी अशा घोषणा देऊन वीजग्राहकांना वीजबिल भरण्याचे आवाहन करण्यात आले. कृषीपंप वीजजोडणी धोरण- २०२० ची माहिती जिल्हावासियांना देण्यात आली. यावेळी वाशिम मंडळाचे अधीक्षक अभियंता विजय मानकर यांनी महावितरण कंपनी ही जनतेला प्रकाशमय करण्याचे काम करीत असून, या कंपनीचे जतन व प्रगती करण्याची जबाबदारी सर्व जनतेची असल्याचे सागितले. कार्यकारी अभियंता रत्नदीप तायडे, पी. के. चव्हाण, प्रभाकर लहाने, शिरीष इंगोले यांनी जनतेला वीजबिल भरणा करण्याचे आवाहन केले. या मोहिमेत महावितरणचे अधिकारी, कर्मचारी मिळून २५ जणांनी सहभाग घेतला होता.