वाशिम : जिल्ह्यातील ४० टक्के अनुदानित शाळांवर कार्यरत पाचशेपेक्षा अधिक शिक्षकांचे जुलै आणि ऑगस्ट महिन्याचे वेतन थकले आहे. सप्टेंबर महिन्याची ७ तारीख ओलांडली असताना २८०० शिक्षकांचे वेतन अदा करण्यात आले, तर ४० टक्के अनुदानित शिक्षकांचे वेतन मात्र अदा झाले नाही. परिणामी त्यांच्यापुढे मोठे आर्थिक संकट उभे झाले आहे.
वाशिम जिल्ह्यात एकूण प्राथमिक आणि माध्यमिक मिळून ३४० खासगी शाळा आहेत. या शाळांवर ३५०० शिक्षक कार्यरत आहेत. शासनाने दर महिन्याच्या १ तारखेला शिक्षकांचे वेतन करण्याचे आदेश दिले असताना त्याची दखल घेतली जात नाही. त्यातच अनेकदा दोन ते तीन महिने शिक्षकांना वेतनाची प्रतीक्षा करावी लागते. वेतन प्रलंबित राहत असल्याने बँकेचे कर्ज घेतलेल्या शिक्षक कर्मचाऱ्यांना बँकांकडून एक्सट्रा पेनल्टी लागते. व्याजही शिल्लकचे भरावे लागते. किराणा, भाजीपाला, वीज बिल, मुलांच्या शिक्षणाचा, आजाराचा, सणावाराचा खर्च, आदींचे नियोजन बिघडून जाते.
००००००००००००००००००००
दोन वर्षांत एकदाही पहिल्या तारखेस वेतन नाही
जिल्ह्यातील संस्थांच्या शाळावरील शिक्षकांचे वेतन गेल्या दोन वर्षापासून एकाही महिन्यात १ तारखेला झालेला नाही. साधारणत: १५ किंवा २० तारखेनंतरच पगार होतात. वेतन पथक आणि कोषागार कार्यालयाच्या संबंधित अधिकाऱ्यांकडे विचारणा केली असता वरिष्ठ स्तरावरून निधीच मिळाला नसल्याचे कारण सांगितले जाते. वेतनाला सतत विलंब होत असल्याने शिक्षकांचे नियोजन कोलमडून ते आर्थिक संकटात सापडत आहेत.
०००००००००००००००००
-जिल्ह्यातील एकूण अनुदानित शाळा -३४०
माध्यमिक शिक्षक - १८२०
प्राथमिक शिक्षक - २६८०
-----------
तालुकानिहाय अनुदानित शाळा
तालुका - शाळा
वाशिम - ७५
कारंजा - ५६
मालेगाव - ३७
रिसोड - ६७
मंगरुळ - ५३
मानोरा - ५२
-------------------------
कोट: खासगी शिक्षकांचे वेतन आमच्याकडून थांबलेले नाही. ७ सप्टेंबर रोजी ४४२ आणि ४७८ हेडखालील शिक्षकांचे वेतन अदा झाले, तर ३३६१ हेडखालील अर्थाल ४० टक्के अनुदानित शाळांतील शिक्षकांचे वेतनही येत्या दोन दिवसांत अदा केले जाणार आहे.
-बालकृष्ण इंगोले,
वेतन पथक अधीक्षक, वाशिम
---------------------
कोट: कोरोनामुळे शाळा बंद असल्या तरी सर्व शिक्षक व्यवस्थित ऑनलाईन, ऑफलाईन अभ्यासक्रम पूर्ण करीत आहेत. संसारिक जबाबदारी पूर्ण करताना त्यांनाही वेळेवर पगार मिळावा, ही अपेक्षा आहे. ही समस्या सर्वच खासगी शाळा शिक्षकांची आहे.
-संदीप देशमुख,
जिल्हाध्यक्ष, शिक्षक महासंघ.