गेल्या सहा दिवसांपासून धनज बु.सह परिसरात मुसळधार पाऊस पडत आहे. या पावसामुळे जनजीवन विस्कळीत झाले असतानाच धनज बु. येथे शुक्रवारी रात्रीच्या सुमारास जोरदार पाऊस पडला. पावसाचे पाणी घराच्या भिंतीत मुरले. त्यामुळे गावातील सुनील डफडे यांच्या घराची एक भिंत काेसळली. यावेळी सुनील डफडे यांचा परिवार झोपेत होता. सुदैवाने त्यांना कोणतीही दुखापत झाली नाही. तथापि, या घटनेत घरातील टी व्ही, कपाट, सहा हजार रुपये किमतीचा किराणा पूर्णपणे या भिंतीखाली दबला. तसेच शेजारीच असलेल्या दीपक डफडे यांच्या घरातील शौचालय व स्नानगृहसुद्धा या पावसामुळे पडले. जोरदार पावसाने डफडे परिवाराचे नुकसान झाले असून, प्रशासनाने या घटनेचा त्वरित पंचनामा करून आर्थिक मदत द्यावी, अशी मागणी सुनील डफडे व दीपक डफडे यांनी केली आहे.
०००००००
सहा दिवसांपूर्वी काजळेश्वरात कोसळली दोन घरे
काजळेश्वर : गेल्या सहा दिवसांपासून सुरू असलेल्या संततधार पावसामुळे विटा, मातीच्या घरांची पडझड होत आहे. कारंजा तालुक्यात आठवडाभरात अशा दोन घटना घडल्या. त्यात काजळेश्वर येथील बंजारा वस्तीतील दोन घरांची सोमवारी रात्री पडझड झाली. सुदैवाने त्यातही कोणाला दुखापत झाली नाही. बंजारा वस्तीतील प्रल्हाद मनिराम पवार यांच्या घरांची भिंत पडली, तसेच तांडा वस्तीतील गणेश विष्णू राठोड यांच्याही घराची भिंत पडल्याने त्यांचे आर्थिक नुकसान झाले.