वाशिम जिल्ह्यात एकूण ६६३ पोलीस पाटलांची पदे मंजूर आहेत. यापैकी ४३४ पदे भरली; तर २२९ पदे रिक्त आहेत. ही रिक्त पदे चार वर्षांपासून भरण्यात आली नसल्याने सध्या एकाच पोलीस पाटलांकडे दोन ते तीन गावांचा कारभार आहे. यामुळे त्यांची चांगली तारांबळ उडत आहे. पोलीस पाटलांची सर्वाधिक पदे ही वाशिम उपविभागात रिक्त आहेत. आधीच मानधन तोकडे असताना गेल्या पाच महिन्यांपासून जिल्ह्यातील पोलीस पाटलांना तेसुद्धा मिळाले नाही. त्यामुळे कायदा सुव्यवस्थेची जबाबदारी पार पाडण्यासाठी त्यांना पदरचा खर्च करावा लागत आहे. त्यात अनेक जणांकडे दोन ते तीन गावांचा प्रभार असल्याने त्यांची अधिक पंचाईत झाली आहे.
-----------------
बॉक्स :
जिल्ह्यात २२९ पदे रिक्त
जिल्ह्यात तब्बल २२९ पोलीस पाटलांची पदे रिक्त असून, एकाच पोलीस पाटलांवर दोन ते तीन गावांचा प्रभार देण्यात आला आहे. त्यामुळे पोलीस पाटीलच नव्हे, तर ग्रामस्थांनाही कमालीच्या अडचणी येत असून, कायदा-सुव्ववस्था विस्कळीत होत आहे. पोलीस पाटलांची सर्वाधिक पदे ही वाशिम उपविभागात रिक्त आहेत. याची दखल मात्र घेतली जात नाही.
००००००००००००