सर्वांच्या आवडत्या गणेशोत्सवाला १० सप्टेंबरपासून उत्साहात सुरुवात झाली. यामध्ये शिरपूर टाउनमधील ११ गणेश मंडळांचाही सहभाग आहे. कोरोनाचा पार्श्वभूमीवर गणेशोत्सव साध्या पद्धतीने साजरा करण्याचे आवाहन शासन व प्रशासनातर्फे करण्यात आली होते. यासाठी प्रत्येक पोलीस स्टेशनमध्ये शांतता समितीच्या दर्शनही पोलीस प्रशासनाने केले. याचा सकारात्मक परिणाम गणेशोत्सवामध्ये दिसून आला आहे. गणेशोत्सवामध्ये शिरपूर पोलीस स्टेशनच्या हद्दीत २३ गावांमध्ये एक गाव गणपती संकल्पना राबविण्यात आली, तर शिरपूर टाउनमध्ये संत सावतामाळी, जय संभाजी, जय बजरंग, मराठा, जय भारत, औंढा नागनाथ, जय शिवराज, संत ज्ञानेश्वर, जय भवानी, सुवर्णकार, जय महाराष्ट्र असे ११ मंडळांच्या वतीने श्रीगणेशाची स्थापना करण्यात आली. शिरपूर पोलीस स्टेशनच्या हद्दीत एकूण ४१ ठिकाणी श्रीगणेशाची स्थापना करण्यात आली. गणेश उत्सव अतिशय साध्या पद्धतीने साजरा करण्यात यावा. याबाबत अगोदरच प्रशासनाकडून गणेश मंडळाच्या पदाधिकाऱ्यांना मार्गदर्शक सूचना देण्यात आले आहेत.
---------
या गावांत ‘एक गाव एक गणपती’
शिरपूर पोलीस स्टेशनअंतर्गत मुठा, येवता, दुधाळा, ढोरखेडा वाघळुद, शेलगाव बगाडे, मांगुळ झनक, गोवर्धना, केशवनगर, नावली, मिर्झापूर, जोगेश्वरी, कुकसा, बोराळा जहागीर, शिरसाळा, बेलखेडा, पेनबोरी, जायखेडा, वसारी, शेलगाव खवणे, पार्डी तिखे, दापुरी कालवे व मसला पेन इत्यादी ठिकाणी ‘एक गाव एक गणपती’ संकल्पना प्रशासनाच्या पुढाकाराने स्थानिक रहिवाशांनी राबविली आहे.