विरार इमारत दुर्घटनाप्रकरणी आणखी चौघांना अटक; जागा मालकाचाही समावेश

विरारमधील रमाबाई अपार्टमेंट इमारत दुर्घटनेप्रकरणी आणखी चौघांना अटक करण्यात आली होती.

लोकमत न्यूज नेटवर्क
नालासोपारा : विरारमधील रमाबाई अपार्टमेंट इमारत दुर्घटनेप्रकरणी नीतल साने (४८) या बांधकाम व्यावसायिकाला अटक करण्यात आली होती. त्यानंतर या प्रकरणाचा तपास गुन्हे शाखा ३ कडे सोपविण्यात आला आहे. पोलिसांनी या प्रकरणात आणखी ४ जणांना अटक केली. त्यात दोन महिलांचा समावेश आहे. आरोपी हे विकासक आणि जागामालक आहेत. 

मंगळवारी विरारच्या नारिंगी येथे रमाबाई अपार्टमेंट ही इमारत कोसळली. त्यात १७ जणांचा मृत्यू झाला तर ११ जण जखमी झाले. याप्रकरणी विकासक नीतल साने (४८) याला अटक केल्यावर तपास गुन्हे शाखा ३ कडे सोपविला. जागामालक परशुराम दळवी आणि विकासक नीतल साने यांच्यात करारनामा झाला होता. दरम्यान, परशुराम दळवी याचे निधन झाले होते. त्यानंतर त्याच्या दोन मुली आणि जावयांनी पुढील बांधकामाची प्रक्रिया केली. २००८ ते २०११ या कालावधीत बांधकाम झाले. 

ते तिघे कोण?
शुक्रवारी गुन्हे शाखेने शुभांगी भोईर (३८), संध्या पाटील (३५) तसेच जावई सुरेंद्र भोईर (४६) आणि मंगेश पाटील (३५) यांना अटक केली आहे. त्यांना वसई न्यायालयात हजर केले असता १४ दिवसांची न्यायालयीन कोठडी देण्यात आली तर विकासक नीतल साने याला पुन्हा न्यायालयात हजर केले असता ६ दिवसांची वाढीव पोलिस कोठडी देण्यात आली, अशी माहिती गुन्हे शाखा २चे वरिष्ठ पोलिस निरीक्षक शाहूराज रणावरे यांनी दिली. ही इमारत बेकायदेशीरपणे बांधली होती. २०२० मध्ये पालिकेने दुरुस्तीची नोटीस बजावली होती. मात्र, विकासक आणि जागामालक यांनी काहीच उपाययोजना केली नव्हती.