अन् मोटरमन स्थानकच विसरला

चर्चगेटमधून नियमतिपणे सुटलेली धीमी लोकल... त्यानंतर टप्प्याने पुढील प्रत्येक स्थानकावर मोटरमनकडून दिला

 मुंबई : चर्चगेटमधून नियमतिपणे सुटलेली धीमी लोकल... त्यानंतर टप्प्याने पुढील प्रत्येक स्थानकावर मोटरमनकडून दिला जाणारा थांबा आणि तेवढ्यातच अचानक धीम्या मार्गावरील एका स्थानकावर न थांबताच संपूर्ण प्लॅटफॉर्म सोडून गेलेली लोकल. ही घटना घडली ती पश्चिम रेल्वेमार्गावरील खार स्थानकाबाबत. या घटनेमुळे नसता मनस्ताप प्रवाशांना सहन करावा लागला. यामुळे एखाद्या अपघातालाही सामोरे जावे लागले असते, असे सांगितले जात आहे. या घटनेची रेल्वेकडून चौकशी केली जाणार आहे. रविवारी सकाळी ११.३१ वाजताच्या क्रमांक ४८१ चर्चगेट-बोरीवली धीम्या लोकलने वेळेप्रमाणे चर्चगेट स्थानक सोडले. ही ट्रेन प्रत्येक स्थानकावर थांबत होती. मरिन लाइन, चर्नी रोड, ग्रँड रोड असे पुढील प्रत्येक स्थानक घेत ती जात होती. मात्र वांद्रे स्थानकात ही लोकल थांबल्यानंतर या लोकलने पुढच्या खार स्थानकातही थांबणे अपेक्षित होते. परंतु वांद्रे स्थानक सोडल्यानंतर ही लोकल पुढच्या खार स्थानकात न थांबताच संपूर्ण स्थानक सोडून पुढे जाऊन थांबली आणि खार स्थानकात उतरण्याच्या तयारीत असणार्‍या प्रवाशांचा एकच गोंधळ उडाला. लोकल स्थानकात का थांबली नाही याची माहिती काही केल्या प्रवाशांना समजत नव्हती. संपूर्ण स्थानक सोडून बाराही डबे पुढे जाऊन थांबल्याने आता उतरायचे कुठे, असा प्रश्न प्रवाशांना पडला. ही घटना रेल्वेच्या नियंत्रण कक्षाला समजल्यानंतर पुढील सूचना येईपर्यंत मोटरमनला त्या ठिकाणीच थांबवण्याचे आदेश देण्यात आले. साधारण २० मिनिटांनतर पुढे जाण्याच्या सूचना वरिष्ठांकडून करण्यात आल्या. (प्रतिनिधी)