‘त्या’ बिबट्याची अंधश्रद्धेतून हत्या

वनविभागाच्या अधिकाऱ्यांनी शनिवारी अटकेत असलेल्या आरोपींना सोबत घेऊन घटनास्थळाची बारकाईने पाहणी केली. इतकेच नव्हे तर आरोपींनी गुन्हा कशा पद्धतीने केला याची माहितीही जाणून घेतली. शुक्रवारी वनविभागाच्या अधिकाऱ्यांनी गोविंद केकापूरे, प्रवीण बुरघाटे, मंगल मानकर, महेश आमझरे, राहूल कासार, रमेश कासार, नरेंद्र कासार या आरोपींना अटक करून त्यांची १५ डिसेंबरपर्यंत वनकोठडी मिळविली आहे.

ठळक मुद्देएका पायाचा शोध सुरू । आरोपींची संख्या पोहोचली अकरावर

वर्धा : मांडवा शिवारात गुरूवारी सुमारे अडीच वर्षीय बिबट्याचा मृतदेह पाय व मुंडके नसलेल्या अवस्थेत आढळून आला. या बिबट्याची शिकार अघोरी शक्ती प्राप्त करण्यासाठी करण्यात आल्याचे वनविभागाच्या आतापर्यंतच्या तपासात पुढे आले आहे. अटक केलेल्या आरोपींकडून मृत बिबट्याचे तीन पाय आणि मुंडके जप्त करण्यात आले आहे;पण बिबट्याचा चौथा पायाचा शोध वनविभागाचे अधिकारी घेत आहेत. शुक्रवारी सात आरोपींना अटक करून त्यांची १५ डिसेंबरपर्यंत वनकोठडी वनविभागाच्या अधिकाऱ्यांनी मिळविली आहे. तर शनिवारी आणखी चार आरोपींना वनविभागाच्या अधिकाऱ्यांनी अटक केल्याने सध्या आरोपींची संख्या अकरावर पोहोचली आहे.
वनविभागाच्या अधिकाऱ्यांनी शनिवारी अटकेत असलेल्या आरोपींना सोबत घेऊन घटनास्थळाची बारकाईने पाहणी केली. इतकेच नव्हे तर आरोपींनी गुन्हा कशा पद्धतीने केला याची माहितीही जाणून घेतली. शुक्रवारी वनविभागाच्या अधिकाऱ्यांनी गोविंद केकापूरे, प्रवीण बुरघाटे, मंगल मानकर, महेश आमझरे, राहूल कासार, रमेश कासार, नरेंद्र कासार या आरोपींना अटक करून त्यांची १५ डिसेंबरपर्यंत वनकोठडी मिळविली आहे. तर शनिवारी अशोक चाफले, आनंदा चाफले, आनंदा रावेकर तर राजू कुभेंबार यांना अटक करण्यात आली आहे. गुरूवारी अटक करण्यात आलेल्या आरोपींपैकी एका आरोपीने अघोरी शक्तीच्या प्राप्तीसाठी संगणमत करून बिबट्याची शिकार केली, शिवाय पुरावे नष्ट करण्याच्या उद्देशाने बिबट्याच्या मृतदेहाची विल्हेवाट लावण्याचाही प्रयत्न केल्याचे वनविभागाच्या अधिकाऱ्यांच्या आतापर्यंतच्या तपासात पुढे आले आहे. शनिवारी अटकेतील आरोपींना सोबत घेत वनविभागाच्या अधिकाऱ्यांनी घटनास्थळाची पाहणी केली. याप्रसंगी सहाय्यक उपवनसंरक्षक तुषार डमढेरे, वनपरिक्षेत्र अधिकारी सागर बन्सोड, क्षेत्र सहाय्यक उमेश शिरपुरकर, श्याम परडके, रवी राऊत, जाकीर शेख, विनोद सोनवणे आदींची उपस्थिती होती.