ठाणे: छत्तीसगड येथून मुंबईला कोळसा घेऊन जाणाऱ्या ट्रकला पाठी मागून येणाऱ्या भरधाव ट्रकने जोरदार धडक दिली. या अपघातात कोळश्याचा ट्रक जागीच उलटला आणि त्यातील कोळसा रस्ताभर पसरला. ही घटना बुधवारी पहाटे ठाण्यातील मुंबई-नाशिक महामार्गावर घडली. (Accident on Mumbai-Nashik Highway; Coal from an overturned truck spread on the road)
रस्त्यावर पसरलेला कोळसा जेसीबीच्या मदतीने तातडीने बाजूला केल्याने सकाळच्या सुमारास या मार्गावरील वाहतूक सुरळीत सूरु झाली होती. या अपघातात एका ट्रकचा चालक आणि दुसऱ्या ट्रकचा क्लिनर असे दोघे जखमी झाले असून त्यांना उपचारार्थ कळवा छत्रपती शिवाजी महाराज रुग्णालयात दाखल करण्यात आले आहे. याप्रकरणाचा तपास राबोडी पोलीस करत आहेत.
ट्रकचालक सहजोद इक्बाल अहमद आणि क्लिनर मोसिम कासिम खान (२५) हे दोघे छत्तीसगड येथून कोळश्याचा ट्रक घेऊन मुंबईला निघाले होते. ते ठाण्यातील मुंबई-नाशिक महामार्गावरील (मुंबई वाहिनीवर), साकेत पुलाशेजारी, रुस्तमजी टॉवरसमोरून जात होते. याच वेळी मागून येणाऱ्या गायीच्या खुराकाने भरलेल्या भरधाव ट्रकची कोळश्याच्या ट्रकला धडक बसली. हा ट्रक मालक आणि चालक प्रमोद पाटोदकर हे धुळे ते मुंबई, असा नेत होते.
ही धडक एवढी जोरात होती, की कोळश्याचा ट्रक रस्त्यावर जागीच उलटला आणि त्यातील कोळसा रस्ताभर पसरला. हा प्रकार बुधवारी पहाटे सव्वा एक वाजण्याच्या सुमारास घडला. अपघाताची माहिती मिळताच, ठामपा प्रादेशिक आपत्ती विभागाचे कर्मचारी, वाहतूक पोलीस अधिकारी, राबोडी पोलीस अधिकारी आणि अग्निशमन दलाच्या जवानांनी घटनास्थळी धाव घेतली. यावेळी १ जेसीबी, २ हायड्रा क्रेनला पाचारण करत तातडीने महामार्गावर पसरलेला कोळसा जेसीबीच्या साहाय्याने बाजूला करण्यात आला. तसेच दोन्ही ट्रक महामार्गाच्या एका बाजूला करून मुंबई-नाशिक महामार्ग सर्व वाहनांसाठी मोकळा करण्यात आला.
या अपघातात ट्रक चालक प्रमोद पाटोदकर (34) यांच्या डोक्याला आणि मानेला किरकोळ दुखापत झाली आहे आणि उलटलेल्या ट्रकचा क्लिनर मोसिम कासिम खान यांच्या उजव्या पायाला गंभीर दुखापत झाली आहे. त्या दोघांनाही कळवा छत्रपती शिवाजी महाराज रुग्णालयात दाखल करण्यात आल्याचे ठामपा आपत्ती व्यवस्थापन कक्षाच्या अधिकाऱ्यांनी सांगितले. याप्रकरणी राबोडी पोलीस ठाण्यात गुन्हा दाखल करण्यात आला आहे.