एकनिष्ठ राहिलेले...! मायक्रोसॉफ्ट जुन्या-जाणत्यांना नोकरीवरून काढणार; नोकरी सोडा नाहीतर स्वेच्छानिवृत्ती घ्या... 

Microsoft voluntary retirement 2026 news: मायक्रोसॉफ्टने आपल्या जुन्या कर्मचाऱ्यांना स्वेच्छा निवृत्ती घेण्याचे आवाहन केले आहे. एआय तंत्रज्ञानाला प्राधान्य देण्यासाठी कंपनीने हा मोठा निर्णय घेतला आहे.

मायक्रोसॉफ्टने आपल्या भविष्यातील वाटचालीसाठी 'एआय फर्स्ट' धोरण स्वीकारले आहे. याच धोरणाचा भाग म्हणून कंपनीने आपल्या अशा कर्मचाऱ्यांना स्वेच्छा निवृत्ती घेण्यास सांगितले आहे, जे अनेक वर्षांपासून कंपनीशी जोडलेले आहेत. कंपनीला आता अशा कर्मचाऱ्यांची गरज आहे जे एआय तंत्रज्ञानात अधिक पारंगत आहेत.

मायक्रोसॉफ्टला आपली गुंतवणूक आणि संसाधने पूर्णपणे कृत्रिम बुद्धिमत्तेच्या विकासाकडे वळवायची आहेत. अनुभवी कर्मचाऱ्यांच्या जागी एआय आणि क्लाउड कम्प्युटिंगमध्ये तज्ज्ञ असलेल्या नवीन प्रतिभेला संधी देण्याचा कंपनीचा मानस आहे. अनुभवी कर्मचाऱ्यांचा पगार आणि भत्ते जास्त असल्याने, स्वेच्छा निवृत्तीद्वारे कंपनीला आपला खर्च नियंत्रित ठेवण्यास मदत होईल.

कर्मचाऱ्यांसाठी ऑफर काय आहे?
मायक्रोसॉफ्टने स्वेच्छा निवृत्ती घेणाऱ्या कर्मचाऱ्यांसाठी एक विशेष पॅकेज जाहीर केले आहे. निवृत्ती घेणाऱ्या कर्मचाऱ्यांना त्यांच्या अनुभवाच्या वर्षांनुसार एक मोठी रक्कम दिली जाईल. यामध्ये बोनस आणि ठराविक काळासाठी आरोग्य विम्याचे संरक्षण देखील समाविष्ट असण्याची शक्यता आहे.

टेक उद्योगातील कल...
केवळ मायक्रोसॉफ्टच नाही, तर गुगल, मेटा आणि अ‍ॅमेझॉन यांसारख्या कंपन्यांनीही एआयसाठी आपल्या कर्मचाऱ्यांच्या संख्येत कपात केली आहे. एआयमुळे येणाऱ्या काळात अनेक पारंपारिक नोकऱ्यांवर गदा येत आहे.