विठ्ठल भक्त आणि तिरुपतीच्या भाविकांचा प्रवास सुकर होणार, पंढरपूर-तिरुपती रेल्वेला कायमस्वरूपी मान्यता

पंढरपूर-तिरुपती साप्ताहिक विशेष रेल्वे कायमस्वरूपी नियमित चालविण्याचा निर्णय रेल्वे मंत्रालयाने घेतला आहे. यामुळे चार राज्यातील भाविकांना दिलासा मिळणार आहे.

Pandharpur Tirupati Special Train: प्रवाशांच्या वाढत्या मागणीनंतर भारतीय रेल्वेनेपंढरपूर-तिरुपती साप्ताहिक विशेष रेल्वे कायमस्वरूपी नियमित चालविण्याचा निर्णय घेतला आहे. या निर्णयामुळे महाराष्ट्र, कर्नाटक, तेलंगणा आणि आंध्र प्रदेशातील भाविकांना मोठा दिलासा मिळणार असून पंढरपूर येथील विठ्ठल मंदिर आणि तिरुपती येथील श्री वेंकटेश्वर मंदिर यादरम्यानची रेल्वे सुविधा अधिक सक्षम होणार आहे.

सध्या विशेष रेल्वे म्हणून धावणाऱ्या गाड्यांना आता नियमित गाडी क्रमांक देण्यात आले आहेत. तिरुपती-पंढरपूर विशेष रेल्वे (क्र. ०७०१२) ही १६ मे २०२६ पासून नियमित रेल्वे (क्र. १७४३७) म्हणून धावणार आहे. 

पंढरपूर-तिरुपती विशेष रेल्वे (क्र. ०७०३२) ही १७ मे २०२६ पासून नियमित रेल्वे (क्र. १७४३८) म्हणून सुरू राहणार आहे. तिरुपती-पंढरपूर साप्ताहिक रेल्वे प्रत्येक शनिवारी दुपारी ४ वाजता तिरुपती येथून सुटून दुसऱ्या दिवशी सायंकाळी ७ वाजता पंढरपूर येथे पोहोचणार आहे. 

कोणत्या स्थानकांवर थांबणार?

पंढरपूर-तिरुपती रेल्वे प्रत्येक रविवारी रात्री ८ वाजता पंढरपूर येथून सुटून पुढील दिवशी रात्री ११:३० वाजता तिरुपती येथे पोहोचेल. ही रेल्वे मोडनिंब, कुडूवाडी, बार्शी टाउन, धाराशिव, लातूर, लातूर रोड, उदगीर, बीदर, जहिराबाद, विकाराबाद, लिंगमपल्ली, बेगमपेठ, सिकंदराबाद, काचीगुडा, शादनगर, महबूबनगर, गडवाल, कुर्नूल सिटी, धोन, गुट्टी, तडीपत्री, कडप्पा, रेनीगुंटा आदी स्थानकांवर थांबा घेणार आहे.

नव्या गाड्यांचे वेळापत्रक

तिरुपती-पंढरपूर विशेष रेल्वे आता क्र. १७४३७ या क्रमांकाने नियमित धावणार असून १६ मे २०२६ पासून सेवा सुरू होईल. ही रेल्वे शनिवारी दुपारी ४ वाजता तिरुपतीहून सुटेल.

पंढरपूर-तिरुपती विशेष रेल्वे आता क्र. १७४३८ या क्रमांकाने १७ मे २०२६ पासून नियमित धावणार आहे. ही रेल्वे प्रत्येक रविवारी रात्री ८ वाजता पंढरपूरहून सुटणार आहे.

चार राज्यांना होणार लाभ

या साप्ताहिक रेल्वेमुळे महाराष्ट्र, कर्नाटक, तेलंगणा आणि आंध्र प्रदेशातील हजारो भाविकांना थेट रेल्वे सुविधा उपलब्ध होणार आहे. मोडनिंब, कुडूवाडी, बार्शी टाऊन, धाराशिव, लातूर, उदगीर, बीदर, सिकंदराबाद, कुर्नूल सिटी, कडप्पा आदी महत्त्वाच्या स्थानकांवर या रेल्वेचा थांबा असणार असल्याने प्रवाशांची मोठी सोय होणार आहे.