सोलापूर/मोहोळ - मोटारसायकलवरुन निघालेल्या एका दुचाकीस्वारास 8 महिलांनी लुटल्याचा धक्कादायक प्रकार उघडकीस आला आहे. आमची ऊसाची टोळी पुढे गेली आहे, त्यासाठी लिफ्ट देण्याची मागणी करत 7 ते 8 महिलांनी चाकूचा धाक दाखवत त्यास लुटले. 19 जानेवारी रोजी रात्री 10.30 वाजता ही घटना घडली. या महिलांनी दुचाकीस्वाराच्या खिशातील पैशांवर डल्ला मारला. तसेच, त्याला मारहाणही केली.
गणेश दादाराव पांढरे (रा.कोन्हेरी, ता. मोहोळ) हे मोटारसायकलवरुन गावाकडे निघाले होते. त्यांना हिवरे पाटीजवळ सायंकाळी साडेपाच वाजण्याच्या दरम्यान एका महिलेने हात करत मदत मागून आमची उसाची टोळी पुढे उतरली आहे. मी कामानिमित्त मागे थांबले होते. मला त्या टोळीजवळ सोडा अशी विनंती केल्याने पांढरे यांनी त्या महिलेला गाडीवर बसवले पुढे थोड्या अंतरावर गेल्यानंतर त्या महिलेने एका ढाब्याजवळ गाडी थांबवा आमच्या इतर सहकारी महिला आहेत, असे सांगितल्याने पांढरे यांनी गाडी थांबवली. त्यांची गाडी थांबल्याचे बघताच इतर सात ते आठ महिला त्यांच्या गाडीला गराडा घालून उभ्या राहिल्या त्यातील एका महिलेने त्यांच्या खिशातील दोन हजार ४०० रुपये काढून घेतले. तसेच इतर महिलांनी त्यांना मारहाण करत चाकूने भीती घातली याबाबत कोणाला काही सांगितले तर आम्ही तुझ्यावर छेडछाडीचा गुन्हा दाखल करेन, अशी धमकी देऊन निघून गेल्या. या महिलांसोबत दोन ते तीन लहान मुलेही असल्याचे फिर्यादीत म्हटले. अधिक तपास पोलीस उपनिरीक्षक धनाजी खापरे करीत आहेत.