Solapur news: आरेवाडी येथील बिरोबा देवाची यात्रा करून घराकडे परतणाऱ्या दोन बैलगाड्यांना टमटमने पाठीमागून जोराची धडक दिल्याने महिला भाविकाचा जागीच मृत्यू झाला तर बैलगाडीतील पाच भाविक जखमी झाले. या अपघातात एका बैलाचा जागीच मृत्यू झाला तर तीन बैल जखमी झाले.
अपघात घडताच टमटममधील चालकासह तिघांनी घटनास्थळावरून धूम ठोकली. हा अपघात बुधवारी रात्री ८ च्या सुमारास सांगोला महूद रोडवरील वाकी शिवणे गावाजवळ घडला. दरम्यान, मृत व जखमींच्या नातेवाइकांनी टमटममधील आरोपींना अटक करावी, या मागणीसाठी रास्ता रोको केला.
शालन महादेव मेटकरी (वय ५३, रा. महाजन फाटा, महूद, ता. सांगोला) असे मृत महिला भाविकेचे नाव आहे. जखमींमध्ये महादेव सुखदेव मेटकरी (वय ६०), ऋतुजा दादासाहेब मेटकरी (वय ७, दोघेही रा. महाजन फाटा, महूद), गणपत धोंडिराम रुपनर (वय ६५), कल्पना गणपत रुपनर (वय ५५) व युवराज बिरू रुपनर (वय ११, रा. महूद येडगेवाडी नंबर २) यांचा समावेश आहे. त्यांच्यावर सांगोल्यात खाजगी रुग्णालयात उपचार सुरू आहेत.
महूद महाजन फाटा व अकलूज रोड येडगेवाडी नंबर २ येथील मृत व जखमी दोन बैलगाड्यांतून रविवारी आरेवाडी या कवठेमहांकाळ येथील बिरोबा देवाच्या यात्रेसाठी गेले होते.
दोन दिवस मुक्कामानंतर बुधवारी यात्रेचा मुख्य दिवस असल्याने बिरोबा देवाचे देवदर्शन करून मेटकरी व रुपनर कुटुंब दोन बैलगाड्यांतून सांगोला मार्गे महूद घराकडे परतीच्या प्रवासाला निघाले होते.
वाटेत त्यांच्या दोन्ही बैलगाड्या एकामागून एक रोडच्या डाव्या बाजूने महूदच्या दिशेने जात असताना रात्री ८ च्यादरम्यान सांगोल्याकडून महूदकडे भरधाव जाणाऱ्या विनानंबरच्या टमटमने बैलगाड्यांना पाठीमागून जोराची धडक दिल्याने हा अपघात घडला.
Web Summary : A woman died and five others were injured when a speeding vehicle hit bullock carts returning from the Biroba Yatra near Sangola. The driver fled the scene. Relatives protested, demanding arrests.
Web Summary : सांगोला के पास बिरोबा यात्रा से लौट रही बैलगाड़ियों को एक तेज रफ्तार वाहन ने टक्कर मार दी, जिससे एक महिला की मौत हो गई और पांच अन्य घायल हो गए। चालक मौके से फरार हो गया। परिजनों ने गिरफ्तारी की मांग करते हुए विरोध प्रदर्शन किया।