टीम इंडियाचा कर्णधार सूर्यकुमार यादव झाला संघातील 'या' खेळाडूचा बॉडीगार्ड; नेमका विषय काय?

Suryakumar Yadav Bodyguard Video: टीम इंडिया पाचव्या सामन्यासाठी केरळमध्ये दाखल झाली, तेव्हा हा प्रकार घडला

Suryakumar Yadav Bodyguard Video: न्यूझीलंड विरुद्धच्या टी२० मालिकेतील पाचव्या आणि शेवटच्या सामन्यासाठी टीम इंडियाचे खेळाडू केरळमधील तिरुअनंतपुरम येथे पोहोचले. सध्याच्या भारतीय संघात केरळचा संजू सॅमसन आहे. तो तिरुअनंतपुरमचा मुलगा आहे. सॅमसन त्याच्या घरच्या मैदानावर आल्यावर त्याला विशेष वागणूक मिळते. यावेळी एक वेगळीच गोष्ट घडली. संघाचा कर्णधार सूर्यकुमार यादवसंजू सॅमसनसाठी चक्क बॉडीगार्ड बनला.

सूर्यकुमार बनला सॅमसनचा बॉडीगार्ड

बीसीसीआयने केरळमधील तिरुअनंतपुरम येथे टीम इंडियाच्या आगमनाचा व्हिडिओ शेअर केला. या व्हिडिओतील मुख्य आकर्षण म्हणजे सूर्यकुमार यादव आणि सॅमसन यांच्यातील मजा मस्ती. हा व्हिडिओ तिरुअनंतपुरम विमानतळावरील आहे. तिथे संजू सॅमसन विमानतळावरून बाहेर पडू लागताच, सूर्यकुमार यादव पटकन त्याच्या समोर आला आणि त्याचा बॉडीगार्ड बनला. केरळमधील तिरुअनंतपुरममध्ये संजू सॅमसनची लोकप्रियता खूप जास्त आहे. ते जाणूनच सूर्यकुमार यादवने संजू सॅमसनला व्हीआयपी वागणूक दिली. त्याने त्याच्या समोरील गर्दी हटवली, लोकांना त्याच्यासाठी जागा सोडण्याचे आवाहन केले, तसेच सॅमसनच्या चाहत्यांना फोटो काढण्यापासूनही रोखले. हे सर्व पाहून, सॅमसन देखील हसू लागला.

Make way for @IamSanjuSamson in 𝗚𝗼𝗱'𝘀 𝗼𝘄𝗻 𝗰𝗼𝘂𝗻𝘁𝗿𝘆 😉

🎥 Don't miss this banter between friends Sanju Samson and Captain Surya Kumar Yadav 😄#TeamIndia | #INDvNZ | @IDFCFirstBank | @surya_14kumarpic.twitter.com/zBAFPmZJGk

— BCCI (@BCCI) January 30, 2026

संजू सॅमसनने तिरुअनंतपुरमबद्दल काय म्हटले?

व्हिडिओमध्ये सूर्यकुमार यादव देखील सॅमसनशी तिरुवनंतपुरमबद्दल बोलत आहे. सॅमसन स्पष्ट करतो की त्याला तिरुवनंतपुरमला येणे नेहमीच आवडते आणि यावेळी हा आणखी खास क्षण आहे. सॅमसनने कदाचित हे सांगितले असेल कारण तो टीम इंडियासोबत सामना खेळण्यासाठी आला आहे.