हणमंत पाटील
सातारा : ‘बाहुबली’ चित्रपटात शिवलिंग खांद्यावर घेतल्याचा दक्षिणेतील अभिनेता प्रभासचा सीन गाजला होता. त्याप्रमाणे वळवाच्या पावसामुळे झालेल्या शेतातील चिखलातून खांद्यावर दुचाकी घेऊन जाणाऱ्या साताऱ्याच्या तरुणाचा फोटो अन् व्हिडीओ सोशल मीडियावर सोमवारी व्हायरल झाला. २५ वर्षे वयाचा विनय शंकर घोरपडे हा तरुण माण तालुक्यातील कुळकजाई (शेडगेवाडी वस्ती) येथील रहिवासी आहे.
गेल्या आठ दिवसांपासून सातारा जिल्ह्यात वळवाच्या पावसाचा जोर आहे. उन्हाळ्यात पहिल्यांदाच दुष्काळी पट्ट्यातील माण, खटाव, फलटण भागांतही अनपेक्षित पाऊस पडला आहे. त्यामुळे प्रत्येकजण या पावसातून प्रवास करताना जुगाड करताना दिसत आहे. त्यामध्ये शेतातून जाणाऱ्या वाटेवर चिखल झाल्याने बैलगाडीलाही मार्ग काढता येत नाही. मग, दुचाकीचे काय होणार, असा प्रश्न कुळकजाई येथील तरुणाला पडला.
कुळकजाई गावच्या विनय घोरपडे नावाच्या या तरुणाने चक्क दुचाकीच बाहुबलीप्रमाणे खांद्यावर घेऊन चिखलातून मार्ग काढला. कौतुकाने दुसऱ्या मित्राने त्याचा व्हिडीओ बनविला अन् बघता-बघता हा व्हिडीओ सोशल मीडियावर रविवारी व सोमवारी दोन दिवसांत प्रचंड व्हायरल झाला. आता सर्वजण कौतुकासाठी या तरुणाचा शोध घेऊ लागले.
‘त्याला’ राग येतोय...
आमचा मित्र विनय घोरपडेचे शिक्षण बारावी झाले आहे. रविवारी तो मळ्यात म्हशीच्या धारा काढण्यासाठी मित्राबरोबर गाडीवरून किटली घेऊन गेला; पण अचानक पाऊस आला. त्यामुळे शेतात चिखल झाला. त्याने पहिल्यांदा किटल्या शेतातील रस्त्यातून पुढे नेऊन ठेवल्या. त्यानंतर दुचाकीला रस्त्या नसल्याच्या रागातून त्याने चक्क गाडीच उचलून खांद्यावर घेतली. साधारण १०० मीटर अंतर चिखल तुडवत तो गाडी शेताबाहेर घेऊन गेला. त्यामुळे कौतुकाने त्याच्या मित्राने काढलेला व्हिडीओ व्हायरल झाला आहे, अशी माहिती गावातील शिवप्रतिष्ठानचे उपाध्यक्ष सोमनाथ फडतरे यांनी ‘लोकमत’शी बोलताना दिली.