लोकमत न्यूज नेटवर्क
सातारा : अनेक वर्षांपासून रखडलेल्या शेंद्रे ते कागल रस्त्याच्या सहापदरीकरण कामाची प्रक्रिया तात्काळ सुरू करून ‘बांधा-वापरा-हस्तांतरित करा’ या तत्त्वावर काम सुरू करण्याच्या सूचना केंद्रीय रस्ते परिवहनमंत्री नितीन गडकरी दिल्या. खासदार उदयनराजे भोसले यांनी केंद्रीय रस्ते परिवहनमंत्री नितीन गडकरी यांची भेट घेतली. यावेळी त्यांनी राज्यातील रस्ते विकासाच्या कामांच्या मागणीचे निवेदन गडकरी यांना दिले. त्यानंतर गडकरी यांनी शेंद्रे-कागल महामार्गाच्या कामाबाबत राष्ट्रीय महामार्ग प्राधिकरणाच्या अधिकाऱ्यांना तात्काळ निविदा काढण्याच्या सूचनाही दिल्या. याप्रसंगी उदयनराजे यांनी केंद्रीय मंत्री गडकरी यांनी राजमुद्रा भेट दिली.
सातारा जिल्ह्यातून जाणाऱ्या राष्ट्रीय महामार्गाचे सहापदरीकरण आणि पुणे ते सातारा या दरम्यानच्या महामार्गाच्या रखडलेल्या विविध कामांबाबत उदयनराजे यांनी भेट घेतली. या भेटीत सातारा जिल्ह्याच्या विकासातील महत्त्वाचा टप्पा असलेल्या रस्त्यांचे जाळे अधिक भक्कम कसे होईल तसेच जिल्ह्यातून जाणारा राष्ट्रीय महामार्ग आणि महामार्गाला जोडणारे जिल्ह्यांतर्गत रस्ते मजबूत करून पायाभूत सुविधा वाढवण्यावर आपला भर आहे. त्यासाठी केंद्राच्या माध्यमातून आवश्यक तो निधी मिळवण्याबाबत गडकरी यांच्याशी चर्चा केल्याचे खासदार उदयनराजे यांनी सांगितले.
दरम्यान, शेंद्रे ते कागल महामार्गावर कराड शहरातील वाहतुकीची कोंडी आणि होणारे अपघात दिवसेंदिवस वाढत चालले आहे. या मार्गावर कराड येथील कोल्हापूर नाक्यावर उड्डाणपूल उभारण्याची मागणी उदयनराजे यांनी केली. या पुलाचे काम लवकरच सुरू होणार असून, त्याबाबत संबंधित अधिकाऱ्यांना सूचना दिल्याचे मंत्री गडकरी यांनी सांगितले. उदयनराजे यांनी पुणे ते शेंद्रे राष्ट्रीय महामार्गाची रखडलेली कामे आणि रस्त्याची झालेली दुर्दशा तसेच खंडाळा बोगद्याच्या कामाबाबत चर्चा केली.
याशिवाय कऱ्हाड ग्रामीण भागातून शहराच्या दिशेने येणारे रस्ते कऱ्हाड शहराभोवती रिंग रोडच्या माध्यमांतून जोडण्याचा प्रस्ताव असून, हा रस्ता तासवडे-शहापूर-अंतवडी-कार्वे-वडगाव-हवेली-कोडोली-पाचवड फाटा असा आहे. यामुळे कऱ्हाड शहराच्या पूर्वभागाला जोडणार हा रिंगरोड असेल, तर साकुर्डी-येणके-येरावळे-विंग-धोडेवाडी फाटा ते पाचवड हा पश्चिम भागाला जोडणारा रिंग रोड असेल. तर पाटण तालुक्यांतील डिचोली कोयनानगर-हेळवाक-मोरगिरी-म्हारूल हवेली-विंग-वाठार-रेठरे-शेणोली स्टेशन या राज्य महामार्गाचे रुंदीकरण करण्याचा प्रस्ताव असून, त्याबाबत चर्चा झाली.
फोटो ओळ : दिल्ली येथे बुधवारी खासदार उदयनराजे भोसले यांनी केंद्रीय दळणवळण व रस्ते वाहतूकमंत्री नितीन गडकरी यांची भेट घेतली.
फोटो नेम : १०उदयनराजे