अपघातग्रस्त टँकरमधून तेल नेण्यासाठी ग्रामस्थांची झुंबड...

अपघातग्रस्त टँकरमधून तेल नेण्यासाठी ग्रामस्थांची झुंबड...

वडूज : वडूज-दहिवडी रस्त्यावर गुरूवारी पहाटेच्या सुमारास टँकर पलटी झाला. सुदैवाने यामध्ये कोणतीही जीवीत हानी झाली नाही. मात्र, टँकरमधील तेल नेण्यासाठी झुंबड उडाली होती. दहिवडीकडून वडूजकडे हा टँकर (एम.एच.४६ ए. एफ. ५९८४) येत होता. गुरूवारी पहाटेच्या सुमारास उतारावर टँकर रस्त्याच्या डाव्या बाजूला पलटी झाला. टँकरचालक पळून गेल्याने पोलिसांची मोठी तारांबळ उडाली होती. हा टँकर खाद्यतेलाचा असल्याने तेलाची गळती होत होती. त्यामुळे नागरिकांनी टँकरमधून गळणारे तेल घेण्यासाठी गर्दी केली होती. काहीवेळाने त्याठिकाणी पोलिस आल्यानंतर नागरिकांना तेथून हटविले. त्यानंतर दुपारी कऱ्हाडवरून क्रेन आल्यानंतर रस्त्याकडेला पलटी झालेला टँकर उभा करण्यात आला. पोलिस निरीक्षक यशवंत शिर्के, हवालदार शांताराम ओंबासे,अमोल जगदाळे, बाबर आदींनी घटनास्थळी भेट दिली. रात्री उशीरापर्यंत चालक व गाडी मालकाचा तपास लागला नाही. (प्रतिनिधी)