सातारा : भंडारा येथील शासकीय रुग्णालयात शॉर्टसर्किटमुळे आग लागून १० बालकांचा मृत्यू झाला. या घटनेची सखोल चौकशी करण्याचे आदेश यंत्रणेला दिले असल्याची माहिती गृहराज्यमंत्री शंभूराज देसाई यांनी दिली.
मंत्री देसाई माध्यमांशी बोलताना म्हणाले की, भंडाऱ्यामधील शासकीय रुग्णालयात लहान मुलांच्या वॉर्डमध्ये जो प्रसंग घडला. त्यामुळे १० शिशूंचा मृत्यू झाला. ही दु:खद घटना आहे. स्थानिक अधिकारी पोलिसांशी बोललो आहे. प्राथमिक माहिती घेण्याचे काम सुरू आहे. शॉर्टसर्किटमुळे हा प्रसंग घडला. या घटनेचे नेमके कारण काय आहे, याची सखोल चौकशी केली जाईल. भंडारा जिल्हा शल्यचिकित्सकांना चौकशीचे आदेश दिले आहेत. मुख्यमंत्री उद्धव ठाकरे यांनी मृतांच्या नातेवाइकांना ५ लाखांची मदत जाहीर केलेली आहे. तसेच आरोग्यमंत्री राजेश टोपे या प्रकरणावर लक्ष ठेवून आहेत. चौकशी केल्यानंतर दोषींवर कठोर कारवाई केली जाईल.
दरम्यान, सातारा शहरातील ग्रेड सेपरेटर येथे लावलेला फलक फाडल्याची माहिती जेव्हा मिळाली तेव्हा अधिकाऱ्यांशी संपर्क साधला. पोलीस विभागातील वरिष्ठ अधिकारी घटनास्थळी गेले. याबाबत गुन्हा दाखल करण्याच्या सूचना केल्या आहेत. सर्व अधिकारी सतर्क राहिले आहेत. हे ज्याने कोणी जाणीवपूर्वक केले असेल तर तो समोर येईल, त्याला शोधून काढतील. हा प्रसंग दुर्दैवी आहे. राज्यातील जनतेने शांतता राखावी, असेही मंत्री देसाई म्हणाले.
ग्रेड सेपटरेटच्या उद्घाटनाची कल्पनाच नव्हती
ग्रेड सेपरेटचे उद्घाटन झाले त्याची मला काहीही कल्पना नव्हती. सोशल मीडियावर मला याची माहिती मिळाली. याबाबतीतील कुठलीही कल्पना मला देण्यात आली नव्हती, असे स्पष्टीकरण मंत्री देसाई यांनी व्यक्त केले.