Satara: गुन्ह्यात जप्त केलेली कार सोडण्यासाठी पाच हजारांची लाचेची मागणी, म्हसवडमध्ये महिला पोलिसावर गुन्हा

पंचासमक्ष पाच हजार मागितल्याचे निष्पन्न

सातारा : गुन्ह्यात जप्त केलेली कार सोडून देण्यासाठी पाच हजारांची लाच मागितल्याप्रकरणी महिला पोलिसावर म्हसवड पोलिस ठाण्यात भ्रष्टाचार प्रतिबंधक कायद्यानुसार गुन्हा दाखल करण्यात आला. ही कारवाई बुधवारी दुपारी म्हसवड येथे करण्यात आली.

नीता नारायण पळे (रा. क्रांतिसूर्यनगर, म्हसवड, ता. माण) असे गुन्हा दाखल झालेल्या महिला पोलिसाचे नाव आहे. याबाबत लाचलुचपत विभागाने दिलेली माहिती अशी की, म्हसवड पोलिसांनी एका गुन्ह्यात तक्रारदाराची कार जप्त केली होती. या प्रकरणाचा तपास हवालदार नीता पळे हिच्याकडे होता. गुन्ह्यात जप्त केलेली कार सोडून देण्यासाठी नीता पळे हिने तक्रारदाराकडे पाच हजार रुपये लाचेची मागणी केली. यानंतर तक्रारदाराने सातारा येथे येऊन लाचलुचपत विभागात रितसर लेखी तक्रार दिली. 

लाचलुचपत विभागाने पडताळणी केली असता नीता पळे ही पंचासमक्ष तक्रारदाराकडे लाच मागत असल्याचे निष्पन्न झाले. त्यानंतर बुधवारी दुपारी म्हसवड पोलिस ठाण्यात तिच्यावर भ्रष्टाचार प्रतिबंधक अधिनियमानुसार गुन्हा दाखल करण्यात आला. ही कारवाई पोलिस उपअधीक्षक राजेश वाघमारे यांच्या मार्गदर्शनाखाली पोलिस निरीक्षक सुनील पाटील, हवालदार गणेश ताटे, नीलेश राजपुरे, नवनाथ शिंदे, स्नेहल गुरव यांनी केली. पोलिस निरीक्षक सुप्रिया गावडे या पुढील तपास करीत आहेत.