कोरोनाचे रुग्ण वाढताच प्रशासनाची चिंता वाढली

वडूज : जिल्ह्यासह खटाव तालुक्यात पुन्हा एकदा कोरोनाचे संक्रमण वाढू लागल्याने आरोग्य यंत्रणा सतर्क झाली आहे. वडूज शहरात ३६, तर मांडवे गावात कोरोनाचे ४१ रुग्ण आढळून आल्याने सर्वत्र खळबळ उडाली आहे. संक्रमणाचा धोका वाढल्याने आता नागरिकांनीदेखील काळजी घेणे गरजेचे बनले आहे.

खटाव तालुक्यात आजवर आढळून आलेल्या ४ हजार २४७ रुग्णांपैकी ३ हजार ९८० रुग्ण बरे झाले आहेत. रुग्ण बरे होण्याचे प्रमाणा समाधानकार असताना तालुक्यात पुन्हा एकदा कोरोनाबाधितांची संख्या वाढू लागल्याने प्रशासनाच्या चिंतित भर पडली आहे. तालुक्याचे मुख्यालय असलेल्या वडूज शहरात ३६, तर वडूजपासून अवघ्या पाच किलोमीटर अंतरावर असलेल्या मांडवे गावात ४१ रुग्ण आढळून आल्याने आरोग्य यंत्रणा सतर्क झाली आहे.

सण, उत्सवानिमित्त होणाऱ्या भेटीगाठी, खरेदीसाठी बाजारपेठेत होणारी गर्दी, प्रवास आणि पर्यटन अशा अनेक कारणांमुळे सध्या सर्वत्रच कोरोना वाढीचा आलेख वाढत चालला आहे. राज्याच्या आरोग्य यंत्रणेनेदेखील कोरोनाची दुसरी लाट येण्याचा अंदाज व्यक्त केला असून, त्यादृष्टीने उपाययोजना करण्याचे काम हाती घेतले आहे. सध्या वडूज शहर व परिसरातील गावांत कोरोनाबाधितांची संख्या वाढू लागली आहे. त्यातच काही दिवसांपूर्वी शाळा सुरू झाल्याने चिंतेतही वाढ झाली आहे. कोरोनाचे संक्रमण रोखण्यासाठी राज्य शासनाने ठरवलेल्या १० कलमी कार्यक्रमाची अंमलबजावणी खटाव तालुक्यातील विविध गावांत तातडीने सुरू करण्याची गरज आता निर्माण झाली आहे.

(पॉइंटर)

तालुक्यातील कोरोना स्थिती

कोरोनाबाधित ४२४७

कोरोनामुक्त ३९८०

उपचार सुरू ११३

आजवर मृत्यू १५४ मयत

(कोट)

सध्या नागरिक कोरोनाबाबतीत योग्य ती काळजी घेत नसल्याचे दिसून येत आहे. गेल्या काही महिन्यांपूर्वी जसे गर्दी टाळणे, मास्कचा नियमित वापर करणे, सॅनिटायझर वापरणे या गोष्टींची पुन्हा काटेकोरपणे अंमलबजावणी व पालन होणे गरजेचे आहे. कोरोना अजून गेलेला नाही. त्यामुळे प्रत्येक नागरिकांनी योग्य ती काळजी घ्यावी.

- डॉ. युनूस शेख, तालुका वैद्यकीय अधिकारी

फोटो : कोरोना लोगो