Satara: शौचालयाच्या टाकीत पडून बालकाचा मृत्यू

कुटुंबीयांनी शोधाशोध सुरू केल्यानंतर त्याच्यासोबत खेळणाऱ्या मुलाने तो पाण्यात पडल्याचे सांगितले

फलटण (जि. सातारा) : बांधकाम सुरू असलेल्या शौचालयाच्या टाकीत पडून साडेतीन वर्षांच्या बालकाचा मृत्यू झाला. ही घटना सोमवारी फलटण तालुक्यातील सरडे येथे घडली. मन्वित बापू भोसले असे मृत्यू झालेल्या बालकाचे नाव आहे.

दत्तात्रय करडे यांनी सरडे गावात मुख्य रस्त्याच्या बाजूला शौचालयाचे बांधकाम सुरू केले होते. शौचालयात सात फुटी खोल टाकी बांधण्यात आली होती. सोमवारी चारच्या सुमारास मन्वित खेळत टाकीजवळ गेला. शौचालयाच्या दरवाजामधून तो थेट टाकीत पडला. 

कुटुंबीयांनी शोधाशोध सुरू केल्यानंतर त्याच्यासोबत खेळणाऱ्या मुलाने तो पाण्यात पडल्याचे सांगितले. स्थानिक तरुणाने टाकीतून त्याला बाहेर काढले आणि पोटातून पाणी काढण्याचा प्रयत्न केला. त्यानंतर फलटण येथे सरकारी रुग्णालयात दाखल केले असता डॉक्टरांनी त्याला मृत घोषित केले.