आदर्की : ‘अंगणवाडी सेविका, मदतनीस या देशाच्या भावी पिढीला घडविण्याचे काम करत आहेत. कोरोना काळात सर्वजण घरात असताना अंगणवाडी सेविकांनी घरोघरी जावून सर्वांच्या आरोग्याची काळजी घेतली. त्याच खऱ्या कोरोना योद्धा आहेत,’ असे गौरवोद्गार फलटण पंचायत समिती सदस्या लताताई कोळेकर यांनी काढले.
मुळीकवाडी (रामोशी वस्ती) येथे तरडगाव बीट अंतर्गत पोषण आहार पंधरवडा व किशोरवयीन मुलींना मार्गदर्शन करताना त्या बोलत होत्या. यावेळी डिजिटल साहित्याचे वितरण करण्यात आले. यावेळी व्यासपीठावर मुळीकवाडीचे उपसरपंच गणेश कदम, ग्रामपंचायत सदस्य लहुराज मोहिते, माजी सरपंच सुनील जाधव, शिक्षण व्यवस्थापन कमिटीचे अध्यक्ष हणमंत जाधव, शिक्षक बँकेचे संचालक अनिल शिंदे, ग्रामपंचायत सदस्या सोनाली जाधव, उषाताई कदम, पर्यवेक्षिका दीक्षित उपस्थित होते.
कोळेकर म्हणाल्या, ‘मुळीकवाडी अंगणवाडीचे कामकाज, स्वच्छता, रंगरगोटी, खेळाचे साहित्य व पोषण आहार याविषयीचे माहिती फलक लक्ष वेधून घेत आहेत.’ यावेळी उपसरपंच गणेश कदम, दीक्षित यांनीही मनोगत व्यक्त केले. कार्यक्रमाला मुळीकवाडी प्राथमिक शाळेचे मुख्याध्यापक हिम्मत जगताप, विजय बोबडे, करंजे, रुक्मिणी कदम, तेजस्विनी सावंत, ताई जाधव, छायाताई कदम, कुंभार उपस्थित होत्या. तेजस्विनी सावंत यांनी स्वागत केले.