वाई : चांदक (ता. वाई) येथील मूळचा रहिवासी असलेला व सध्या इंद्रपुरी सोसायटी, जगताप हॉस्पिटलनजीक राहणारा अजिंक्य सुनील येवले या तरुणाचा सोमवारी सकाळी पावणेदहाच्या सुमारास पुणे येथे अपघाती मृत्यू झाला.
बीआरटी मार्गामध्ये पीएमपीएमएलच्या बसला ओव्हरटेक करीत असताना हा अपघात झाल्याची प्राथमिक माहिती समोर आली आहे. अपघात एवढा जबरदस्त होता की, यात बसने पेट घेतला. परंतु सर्व प्रवासी व चालक थोडक्यात बचावले.
याबाबत सविस्तर माहिती अशी की, सकाळी पावणेदहाच्या सुमारास वारजे माळवाडीहून वाघोलीच्या दिशेने निघालेल्या बसला बीआरटी या बससाठी राखीव असलेल्या मार्गामध्ये ओव्हरटेक करीत असताना अजिंक्यचा दुचाकीवरील ताबा सुटल्याने त्याची बसला जोरदार धडक बसली. यात तो गंभीररित्या जखमी झाला. उपचारादरम्यान त्याचा मृत्यू झाला. धडक जोरदार असल्याने बसने पेट घेतला. यावेळी बसमध्ये वीस प्रवासी प्रवास करीत होते. परंतु त्यांना कोणतीही दुखापत झाली नाही.
येवले हा पुणे येथे आयटी क्षेत्रामध्ये कार्यरत होता. त्याच्या अपघाती जाण्याने त्याच्या गावी व सोसायटीमध्ये हळहळ व्यक्त करण्यात येत आहे.