मिरज -जिल्हा परिषद पदाधिकारी बदलाचा भाजप नेत्यांचा घोळ अद्याप संपलेला नाही. निर्णयासाठी पुढील रविवारी (दि. १४) पुन्हा बैठक घेण्याचा निर्णय रविवारी झाला. खासदार संजय पाटील यांच्या उपस्थितीत येथील शासकीय विश्रामगृहात बैठक झाली.
महापालिकेत बहुमत असतानाही सत्ता गमवाव्या लागलेल्या भाजप नेत्यांनी आता ताकही फुंकून पिण्याचा निर्णय घेतल्याचे यामुळे स्पष्ट झाले आहे. जिल्हा परिषदेत काठावरचे बहुमत असल्याने पदाधिकारी बदलात धोका असल्याची शंका बैठकीत व्यक्त झाली. जिल्हाध्यक्ष पृथ्वीराज देशमुख यांनी पदाधिकारी बदलाबाबत चार दिवसांत निर्णय घेणार असल्याचे बैठकीनंतर पत्रकारांना सांगितले.
जिल्हा परिषदेची मुदत नऊ महिने शिल्लक असून या काळासाठी पदाधिकारी बदल केला जावा, असा सदस्यांचा आग्रह आहे. त्यासाठीच्या बैठकीला सत्यजित देशमुख, रणधीर नाईक, सम्राट महाडिक, नीता केळकर, मकरंद देशपांडे, राजेंद्र देशमुख आदी उपस्थित होते. अध्यक्षा प्राजक्ता कोरे यांच्यासह आमदार सुरेश खाडे, सुधीर गाडगीळ, गोपीचंद पडळकर यांच्यासह अजितराव घोरपडे उपस्थित नव्हते. खाडे व गाडगीळ यांच्याशी बैठकीतून फोनद्वारे संपर्क साधण्यात आला. बदलासाठी आपण सहमत असून निर्णयाची जबाबदारी खासदार पाटील यांच्याकडे आमदारांनी सोपविली.
जिल्हा परिषदेत भाजपच्या २३ सदस्यांना आ. बाबर, अजितराव घोरपडे व महाडिक समर्थक ९ जणांचा पाठिंबा आहे. भाजपचे काठावरचे बहुमत असून बदलत्या परिस्थितीत आमदार अनिल बाबर व अजितराव घोरपडे यांचा पाठिंबा कायम राहील याची खात्री नसल्याने जिल्हा परिषद पदाधिकारी बदलताना पक्षाला फटका बसण्याची शक्यता आहे. यामुळे इच्छुकांचा आग्रह असला तरी पदाधिकारी बदलासाठी सावधानतेने पावले टाकावी लागतील, अशीही चर्चा बैठकीत झाली. पदाधिकारी बदलाबाबत जिल्ह्यातील आमदार व सर्व नेतेमंडळींसोबत चर्चा करून चार दिवसात याबाबत निर्णय घेण्यात येणार असल्याचे पृथ्वीराज पाटील यांनी सांगितले.
चौकट
आता रविवारी पुन्हा बैठक
बदलासंदर्भात रविवारी (दि. १४) नेतेमंडळी पुन्हा बैठक घेणार आहेत. बदलासंदर्भात आजच निर्णय जाहीर करण्यासाठी सदस्यांचा खासदार पाटील यांच्याकडे आग्रह होता, पण खाडे, गाडगीळ, दीपक शिंदे-म्हैसाळकर अनुपस्थित असल्याने पुढील रविवारचा मुहूर्त निश्चित करण्यात आला.