फोटो : २३ कुपवाड १ -जखमी साहेबराव पुजारी
कुपवाड : शहरातील बजरंगनगर येथील साहेबराव दगडू पुजारी या सेवानिवृत्त कंत्राटी महापालिका कर्मचाऱ्यांवर अज्ञाताकडून तलवार हल्ला करण्यात आला. त्यात ते जखमी झाले आहेत. त्यांच्या डोक्यावर व हातावर चार वार झाले आहेत. या घटनेची अद्याप कुपवाड पोलिसांत नोंद झालेली नाही.
याबाबत जखमीच्या नातेवाईकांकडून मिळालेली माहिती अशी की, जखमी साहेबराव पुजारी हे महापालिका पाणीपुरवठा विभागाचे सेवानिवृत्त कंत्राटी कर्मचारी आहेत. गुरुवारी सायंकाळी पुजारी घरात वाफ घेत बसले होते. यावेळी अज्ञात इसम तोंडावर रूमाल बांधून हातात धारदार तलवार घेऊन आला. त्याने प्रथम पुजारी यांच्या डोक्यावर पाठीमागील बाजूस दोन वार केले तसेच हल्ला चुकताना डाव्या हातावरही दोन वार झाले आहेत. हल्ला झाल्यावर पुजारी यांनी आरडाओरडा करताच हल्लेखोर दोन साथीदारांच्या मदतीने मोटारसायकलीवरून पसार झाला आहे.
या घटनेची माहिती मिळताच नातेवाईकांनी पुजारी यांना सांगलीतील वसंतदादा रुग्णालयात दाखल केले आहे. जखमीच्या डोक्यात व हातावर गंभीर स्वरूपाचे चार वार झाल्याने त्यांच्यावर शस्त्रक्रिया करण्यात आली आहे. या घटनेची नोंद अद्यापही कुपवाड एमआयडीसी पोलीस ठाण्यात झाली नाही. तलवार हल्ल्याच्या घटनेने शहर परिसरात खळबळ माजली आहे. मात्र, हल्ला झाल्याचे कारण समजू शकले नसल्याची माहिती मिळाली आहे.