Sangli: ‘व्हिडिओ व्हायरल’ची धमकी देत अल्पवयीन मुलीवर अत्याचार, संशयितावर गुन्हा दाखल

धमकी देऊन त्याने तिच्याशी वारंवार जबरदस्तीने शारीरिक संबंध ठेवले

सांगली : अल्पवयीन मुलीचा अश्लील व्हिडिओ बनवून तो ‘व्हायरल’ करण्याची धमकी देऊन लैंगिक अत्याचार केल्याचा प्रकार उघडकीस आला आहे. तिला जातीवाचक शिवीगाळ करून मारहाण केल्याप्रकरणी संशयित मिलिंद भुई (रा. उदगाव, ता. शिरोळ) याच्याविरुद्ध सांगली ग्रामीण पोलिस ठाण्यात सुधारित बाललैंगिक अत्याचार प्रतिबंधक कायदा (पोक्सो) आणि ‘ॲट्रॉसिटी’ नुसार गुन्हा दाखल झाला आहे.

पोलिसांनी दिलेली माहिती अशी, पीडित अल्पवयीन मुलगी ही १६ वर्षांची असून, सध्या ती शिक्षण घेत आहे. गतवर्षी ऑक्टोबर २०२५ मध्ये संशयित मिलिंद याने पीडितेला तिच्या गावातील एका मंदिराजवळ गाठले. तिचा अश्लील व्हिडिओ बनवला. तो व्हिडिओ सोशल मीडियावर व्हायरल करण्याची धमकी देऊन त्याने तिच्याशी वारंवार जबरदस्तीने शारीरिक संबंध ठेवले. जानेवारी २०२६ अखेर संशयित मिलिंद याने तिच्यावर लैंगिक अत्याचार केला. 

जबरदस्तीने शारीरिक संबंध ठेवताना पीडित मुलीने आरडाओरडा करण्याचा प्रयत्न केल्यानंतर तिला मारहाण केली. तसेच जातीवाचक शिवीगाळ केल्याचे पीडितेने फिर्यादीत म्हटले आहे. पीडितेने मंगळवारी सांगली ग्रामीण पोलिस ठाणे गाठून फिर्याद दिल्यानंतर मिलिंद भुई याच्याविरुद्ध पोक्सो, ॲट्रॉसिटीनुसार गुन्हा दाखल केला आहे.