सांगलीत संडे नव्हे, लॉकडाऊनचा थंड डे

सांगली : वीकेंड लॉकडाऊनला रविवारी दुसऱ्या दिवशीही जिल्ह्यातील नागरिकांनी मोठा प्रतिसाद दिला. रविवारी सुटीच्या दिवशी नेहमी गजबजलेल्या असणाऱ्या बाजारपेठांमध्ये शुकशुकाट पसरला होता. जिल्ह्यातील सर्व व्यवहार ठप्प झाल्यामुळे नागरिकांनी यावेळी संडे नव्हे, थंड डे अनुभवला.

शुक्रवारी रात्री आठ वाजता सुरू झालेला लॉकडाऊन रविवारी शेवटच्या दिवशीही नागरिकांच्या उत्स्फूर्त प्रतिसादामुळे चर्चेत राहिला. नागरिक, व्यावसायिकांनी नियमांचे काटेकोर पालन करीत शासनाच्या, जिल्हा प्रशासनाच्या आवाहनास प्रतिसाद दिला. रविवारी सांगलीच्या बाजारपेठांमध्ये सुटी असल्याने नेहमी गर्दी होत असते. बाजारपेठा, रस्ते, चौक, क्रीडांगणे, उद्याने, हॉटेल्स ही ठिकाणे गर्दीने फुलून गेलेली असतात. कोरोना संसर्ग थांबविण्यासाठी शासनाने वीकेंड लॉकडाऊन जाहीर केल्यानंतर नागरिकांनी स्वत:वर निर्बंध लादत घरातच राहणे पसंत केले. त्यामुळे शहरापासून जिल्ह्याच्या वाड्यावस्त्यांपर्यंत सर्वत्र शांतता दिसून आली.

शनिवारप्रमाणेच रविवारीही रस्ते ओस पडले होते. उपनगरांमधील छोट्या रस्त्यांवरही गर्दी दिसून आली नाही. पेट्रोलपंप, एटीएम, दवाखाने, मेडिकल्स, वैद्यकीय सुविधा वगळता सर्व व्यावसाय बंद होते. सार्वजनिक वाहतूक व्यवस्थाही बंद राहिल्याने रस्ते निर्मनुष्य दिसत होते.

लॉकडाऊनच्या पार्श्वभूमीवर शहरासह जिल्ह्यात ठिकठिकाणी पोलीस बंदोबस्त ठेवण्यात आला हाेता. नागरिकांनीच उत्स्फूर्त प्रतिसाद दिल्याने पोलिसांना फार काही करावे लागले नाही. तरीही काही ठिकाणी बाहेर फिरणाऱ्या नागरिकांना पोलिसांनी विचारणा केली.

चौकट

मार्केट यार्डमधील उलाढाल ठप्प

सांगलीच्या मार्केट यार्डमधील कृषी मालांची उलाढाल गेल्या दोन दिवसांपासून ठप्प आहे. लॉकडाऊनमुळे बाजारात मालही येऊ शकला नाही. येथील व्यापारी, अडते व हमालांनी लॉकडाऊनला उत्स्फूर्त प्रतिसाद दिला.

चौकट

एसटीचे मोठे नुकसान

सांगली जिल्ह्यातील बसेस गेल्या दोन दिवसांपासून बंद राहिल्यामुळे जिल्ह्याच्या एसटीचे लाखो रुपयांचे नुकसान झाले. सोमवारपासून काही प्रमाणात फेऱ्या सुरू होण्याची चिन्हे असली तरी दोन दिवसांचे नुकसान सहन करावे लागले.

चौकट

खेळात रंगली कुटुंबे

लॉकडाऊनमुळे नागरिकांना दोन दिवस घरी बसून राहावे लागले. त्यामुळे अनेक घरांमध्ये कॅरम, बुद्धिबळ, सापसिडी असे खेळ रंगले होते. काही ठिकाणी गल्ली-बोळातील रस्त्यांवर क्रिकेटचा खेळही रंगला होता.