सांगली : सांगली मिरज आणि कुपवाड महापालिकेकडून महिला दिनानिमित्त योग सप्ताहाचे आयोजन करण्यात आले आहे. यानिमित्त विविध क्षेत्रात उल्लेखनीय कामगिरी करणाऱ्या महिलांचा सन्मान केला जाणार आहे, अशी माहिती महिला बालकल्याण सभापती गीतांजली ढोपे-पाटील यांनी दिली.
कोरोनाच्या पार्श्वभूमीवर महापालिकेकडून प्रातिनिधिक स्वरूपात महिला दिन कार्यक्रम आयोजित केला आहे. यामध्ये ८ मार्च रोजी दुपारी १ वाजता मिरजेतील बालगंधर्व नाट्यगृहात महापौर दिग्विजय सूर्यवंशी, उपमहापौर उमेश पाटील, आयुक्त नितीन कापडणीस, स्थायी सभापती पांडुरंग कोरे, उपायुक्त राहुल रोकडे, उपायुक्त स्मृती पाटील यांच्यासह नगरसेवकांच्या उपस्थितीत महिलांचा सत्कार तसेच जीवन गौरव पुरस्काराने सन्मान केला जाणार आहे. महिलांचे आरोग्य सुस्थित राहावे आणि योगाकडे सर्वांनी वळावे, या उद्देशाने योग सप्ताहसुद्धा घेण्यात येत आहे. ८ मार्च ते १४ मार्च या कालावधीत दररोज सकाळी साडेआठ ते साडेनऊ या वेळत ऑनलाईन योग शिबिर घेतले जाणार असून योग शिक्षक हर्षद गाडगीळ हे शिबिर घेणार आहेत. या योग शिबिरात सर्वांना सहभागी होता यावे यासाठी झूम ॲपद्वारे हे शिबिर घेतले जाणार आहे. याचा आयडी महापालिकेच्या फेसबुक पेजवर उपलब्ध केला जाणार आहे. या शिबिरात जास्तीत जास्त लोकांनी सहभागी व्हावे, असे आवाहनही सभापती पाटील यांनी केले आहे.